کۆمپانیای بی پی: یەدەگی نەوتی کەرکوک پێنج ملیار بەرمیلە

کۆمپانیای بی پی بەریتانی دواى گرێبەستکردنیان لەگەڵ حکومەتی عێراق ئاشکرای دەکات, یەدەگی نەوتی کەرکوک پێنج ملیار بەرمیلە و بەمزووانە لە کێڵگە نەوتییەکانی پارێزگاکە دەست بە وەبەرهێنان دەکاتەوە, بەگوێرەی ئەو گرێبەستە، لە قۆناغی یەکەمدا بی پی بەرهەمهێنانی نەوت و غاز بە بڕی زیاتر لە ٣ ملیار بەرمیل نەوت دەگرێتەوە .
ئەمەش لەکاتێکدایە لە ساڵانی 2014 تاوەکو 2017 بەهۆی شەڕی داعشەوە گرێبەستی کارکردنی لە کێڵگە نەوتییەکانی کەرکووک دواخست .
هەروەها وەزارەتی نەوتی عێراق وردەکاری رێکەوتنەکەی لەگەڵ کۆمپانیای BP بەریتانی بۆ پەرەپێدانی چوار کێڵگەی نەوتی کەرکوک بڵاوکردووەتەوەو دەڵێت: بەرهەمهێنانی نەوتی ئەو چوار کێڵگەیە بۆ 420 هەزار بەرمیلی نەوتی رۆژانە بەرزدەبێتەوە و ڕێککەوتنەکە بۆ ماوەی 25 ساڵەو دەکرێت دوای ئەو ماوەیە بۆ پێنج ساڵی دیکەش درێژبکرێتەوە.
بەپێی گرێبەستەکە خزمەتگوزاری کۆمەڵایەتی بۆ ناوچەکانی دەوروبەری کێڵگەکان دەرەخسێندرێت .
لە گرێبەستەکەدا هاتووە کە 85% کادرو کارمەندانی کۆمپانیاکە عیراقی دەبن، بەمەش هەزاران هەلی کار دەرخسێنێت بۆ هاوڵاتیان و کۆمپانیا ناوخۆییەکان.