وەزارەتی دادی عیراق: 500 سزادراو بە یاسای لێبووردنی گشتیی ئازادكراون

تا ئێستا 500 سزادراو بەپێی یاسای لێبووردنی گشتیی لە زیندانەكانی عیراق  ئازادكراون و پێشبینیش دەكرێت تا ناوەڕاستی ئەمساڵ ژمارەیەكی زیاتری سزادراون ئازادبكرێن و جەنجاڵیی ناو چاكسازییەكان كەمببنەوە.

لەو بارەیەوە ئەحمەد لعێبی وتەبێژی وەزارەتی دادی عیراق بە ئاژانسی هەواڵی عیراقی رایگەیاندووە، وەك وەزارەتی داد لایەنی جێبەجێكاری بڕیارەكانی ئەنجومەنی دادوەرین سەبارەت بە ئازادكردنی سزادراون، دوای ئەوەی بڕیاری لێبووردنی گشتیی پلەی كۆتایی وەردەگرێت و  دەستبەجێ سزادراوەكان ئازاد دەكرێن.

پێش ئازادكردنی هەر سزادراوێكیش، لێكۆڵینەوە دەكەن و لەوە  دڵنیا دەبنەوە كە لە هیچ كەیسێكی تر داواكراو نەبێت، ئەو كات ئازاد دەكرێت.

بە وتەی ئەحمەد لعێبی پێشبینی دەكەن بەهۆی یاسای لێبووردنی گشتییەوە، تا ناوەڕاستی ئەمساڵ ژمارەیەكی زۆر سزادراو ئازاد بكرێن و كاریگەریی هەبێت لەسەر كەمبوونەوەی ژمارەی سزادراون لە چاكسازییەكان.

راشیگەیاندووە، وەزارەتی داد پلانێكی داڕشتووە بۆ رێگەگرتنی لە جەنجاڵبوونی چاكسازییەكان، بەمەبەستی جێگەكردنەوەی زۆرترین ژمارەی سزادراو لە چاكسازییەكاندا تا كۆتایی ئەمساڵ.

ئەو وتەبێژە تەئكیدیشی كردووەتەوە لەوەی، بەپێی  پلانی وەزارەی داد چاكسازیی نوێ لە هەریەك لە میسان و دیوانییە دەكرێتەوە و چاكسازییەكانی نەینەوا و بەغدا فراوانتر دەكرێن.