مۆنۆمێنتی ئه‌نفال لە نێو دڵی لەندەن جێگیركرا

مۆنۆمێنتی ئه‌نفال به‌ رەسمی له‌ناو حكومه‌تی خۆجێی له‌نده‌ن له‌ به‌ریتانیا داندرا و پارێزگاره‌ كورده‌كه‌ی پێشوی له‌نده‌نیش ده‌ڵێت: ئه‌مه‌ وه‌ك رێزگرتنێكی رەسمیە و دانپێدانانه‌ به‌ جینۆسایدی گه‌لی كورد.
سه‌رباز به‌رزنجی پارێزگاری پێشوی له‌نده‌ن – لامبس و سه‌رۆكی ئێستای گروپی كورد له‌ پارتی كرێكارانی به‌ریتانیا رایگەیاند: ‎شانازییه‌كی مێژووییه‌ كه‌ مۆنۆمێنتی ئه‌نفال له‌ باڵه‌خانه‌ی رەسمی حكومه‌تی خۆجێی له‌نده‌ن -لامبس، له ‌دڵی له‌نده‌نی پایته‌ختی به‌ریتانیا جێگیركراوه، خۆشحاڵ و سه‌ربه‌رزم كه‌ ئه‌م شانازییه‌ مێژوییه‌ به‌ر من بڕاوه‌ له‌جێگیركردنی مۆنۆمێنته‌كه‌ و رێزگرتن له‌ قوربانیانی ده‌ستی سته‌م و زۆرداری.
ئاماژه‌ی به‌وه‌كردووه‌: ئه‌مه‌ بڕیارێكی ساده‌ نه‌بوو، به‌ڵكو پابه‌ندبونێكی قووڵه‌ به‌ دانپێدانان به‌ یه‌كێك له‌ تاریكترین لاپه‌ڕه‌كانی مێژووی هاوچه‌رخ، چونكه‌ جینۆسایدی ئه‌نفال و هێرشه‌ كیمیاییه‌كه‌ی سه‌ر هه‌ڵه‌بجه‌، یادكردنه‌وه‌ی زیاتر له‌ 182 هه‌زار رۆحی بێتاوانه‌ كه‌ له‌ هه‌ڵمه‌تێكی دڕندانه‌ كرانه‌ ئامانج ته‌نیا له‌به‌ر ئه‌وه‌ی كورد بوون.
باسی له‌وه‌شكردووه‌: ‎ئه‌ركی سه‌رشانیانه‌ راستییه‌كان بڵێن، نه‌وه‌كانی داهاتو فێربكه‌ن و دڵنیاببنه‌وه‌ كه‌ ئه‌م تاوانانه‌ هه‌رگیز له‌بیر ناكرێن و هه‌رگیزیش دوباره‌ نابنه‌وه‌، ئه‌م مۆنۆمێنته‌ شاهیدێكی هه‌میشه‌یی ده‌بێت له‌سه‌ر ئه‌و به‌ڵێنه‌.