دانیشتنەکانی ئەنجوومەنی نوێنەرانی عیراق دەستپێدەکاتەوە

 
رۆژی چوارشەممەی ئەم هەفتەیە پشووی ئەنجوومەنی نوێنەرانی عیراق کۆتایی دێت و دانیشتنەکانی ئەنجوومەنەکە دەستپێدەکاتەوە.
غەریب ئەحمەد ئەندامی ئەنجوومەنی نوێنەرانی عیراق رایگەیاند، کۆمەڵێک پرۆژەیاسای گرنگ لەسەر مێزی سەرۆکایەتیی ئەنجوومەنی نوێنەرانن و چاوەڕێی راگەیاندنی خشتە و کارنامەی دانیشتنەکان دەکەن .
ئاشکراشیکرد: لەبارەی ئەگەری هەڵوێست وەرگرتنیان بەهۆی دواکەوتنی مووچەی مووچەخۆرانی هەرێمی کوردستانەوە، دەتوانن بەشداریی دانیشتنەکانی ئەنجوومەنی نوێنەران نەکەن، بەتایبەت بۆ ئەو پرۆژە یاسایانەی سوننە و شیعەکان داوایدەکەن لەم خولەدا پەسەند بکرێن، تاوەکو ببێتە فشارێک لەسەر هەولێر و بەغداد بۆ ئەوەی کێشەی مووچە چارەسەربکەن .
جەختیشیکردەوە، لەم دۆخەی ئێستادا باوەڕیان بە گفتوگۆیەکی راشکاوانەیە کە هەردوو حکومەتی عیراق و هەرێمی کوردستان پابەندییەکانیان جێبەجێ بکەن و چیتر مووچەی مووچەخۆران دوانەخرێت.
وتیشی: وەک لیژنەی کشتوکاڵی رەشنووسی پرۆژەیاسایەکمان پێشکەشکردووە کە تایبەتە بە گۆڕانی کەشوهەوا و بەردانەوەی ئاو لە تورکیا و ئێرانەوە بۆ عیراق.