رۆژنامەیەکی تورکی: ئامادەکاریی پەکەکە بۆ دانانی چەک دەستیپێ کردووە

رۆژنامەی نەفەسی تورکی بڵاویکردەوە، ئامادەکاریی (پەکەکە) بۆ دانانی چەک بە چاودێریی حکومەتی هەرێمی کوردستان دەستیانپێکردووە.
رۆژنامەکە دەڵێت، بە چاودێری حکومەتی هەرێم لە پێنج خاڵی جیاوازدا چەک دادەنرێت و سەرجەم چەکەکان تۆمار دەکرێن.
لەمانگی ئایاری ئەمساڵ لەسەر داوای عەبدوڵا ئۆجالان، پەکەکە کۆنگرەی بەست و بڕیاری خۆهەڵوەشاندنەوە و چەکدانانی دا. بەگوێرەی زانیاریی میدیا تورکییەکان، پرۆسەکە درێژخایەن دەبێت و بەپێی قۆناغ دەبێت، حکومەتی هەرێمی کوردستان و حکومەتی عێراق سەرپەرشتی دەکەن.
پێشتر رێبەر ئەحمەد، وەزیری ناوخۆی هەرێمی کوردستان لە رایگەیاندبوو، هەرێمی کوردستان بۆ نزیککردنەوەی [تورکیا و پەکەکە] رۆڵی خۆی گێراوە و لە داهاتووشدا هەمان رۆڵی دەبێت.
لەبارەی پرۆسەی ئاشتییەوە رەجەب تەیب ئەردۆغان لەسەرەتای ئەم مانگەوە رایگەیاند، تورکیا دەچێتە قۆناغێکی نوێوە و پێ دەنێتە نێو “داهاتوویەکی بەهێزترەوە.”