لەهەرێم ژمارەیەك حاڵەتی ئۆمیكرۆن تۆماركرا

وەزیری تەندروستی هەرێم راگەیاند: بەپێی ئەنجامی پشكنینەكان بۆ یەكەمجار لەهەرێم 5 حاڵەتی توشبوون بەئۆمیكرۆن تۆماركرا كە خەڵكی دهۆكن.
د.سامان بەرزنجی وەزیری تەندروستی هەرێم لەكۆنگرەیەكی رۆژنامەوانیدا رایگەیاند: دوای پشتڕاستكردنەوەی ئەنجامەكانی پشكنین بۆ یەكەمجار 5 حاڵەتی توشبوون بەئۆمیكرۆن لەهەرێم تۆماركراوە كە سەرجەمیان خەڵكی دهۆكن و بەشێكیان لەدەرەوە گەڕاونەتەوە.
وتیشی: توشبووەكان باری تەندروستیان جێگیرەو داخڵی نەخۆشخانە نەكراون و پێویستیان بەچارەسەری توندنیە.
ئەوەشی خستەڕوو: لەئێستادا ئۆمیكرۆن لەهەرێم هەیەو رەنگە لە رۆژانی داهاتودا لەپارێزگاكانی تریش حاڵەتی تر پشتڕاستبكرێتەوە، بۆیە ئەوانە لەدەرەوە دەگەڕێنەوە دەبێت لەكاتی بوونی نیشانەكانی هەوكردن لەبەشی سەرەوەی كۆئەندامی هەناسەدان سەردانی سەنتەرەكان بكەن.