ملمێلانێی ناسنامە و چاوەڕوانی گۆدۆ

لە شانۆی ژیاندا، مرۆڤ لە نێوان ئینتما وچوونەئامێزدا دەسوڕێتەوە، لە نێوان ئەوەی کە بەشێک بێت لە قەوارەیەک کە باوەڕی پێی هەیە و بەرگری لێ دەکات، یان خۆی فڕێ بداتە باوەشی ڕاستییەک کە رۆژگار بەسەریدا سەپاندووە. وەک لە شانۆنامەی "لە چاوەڕوانی گۆدۆ"ی ساموێل بێکێتدا، لەوانەیە خۆمان لە دۆخێکی چاوەڕوانی پووچدا ببینینەوە ، بەدوای ڕزگارکەرێک یان وەڵامێکدا دەگەڕێین کە نایەت، لە کاتێکدا سوارەکان بە لامانەوە تێدەپەڕن، هەندێکیان شمشێری ژەنگاویان هەڵگرتووە و وا دەزانن هێشتا توانای بڕینیان ماوە ئەوانی دیکە بە ڕەنگەکانی نامۆبوونەوە  دێنەوە لامان ، واقیعێکمان بەسەردا دەسەپێنن کە ئێمە هەڵمان نەبژاردووە بەڵام دەبێت لەگەڵیدا بگونجێن.
هەندێک کەسایەتی بە ژیانمادا  تێدەپەڕن بانگەشەی ئەوە دەکەن کە ڕاستی ڕەهایان هەڵگرتووە بەگوێرەی بینینی ئەوانيش  تەنها  خۆیان  توانای گۆڕانکارییان هەیە. بەڵام کاتێک وردەبینەوە بۆمان دەردەکەوێ کە  شمشێرەکانیان ژەنگیان گرتووە، رۆژگار کولی کردووە  چیتر بەکەڵکی شەڕکردن یان بەرگریکردن لەو بەهایانە  نایەت کە بانگەشەی نوێنەرایەتیان دەکەن. ئەمانە ئەوانەن کە لە ڕابردوودا دەژین، دەستیان بە دروشمگەلێکەوە گرتووە کە واتای خۆیان لەدەست داوە، بێ ئەوەی تێبگەن کە ئەمانە چیتر کاریگەرییان نەماوە. ئەوانە وادەزانن  ئینتما تەنها دووبارەکردنەوەی وشەیە، بێ هیچ کردەوەیەکی ڕاستەقینە کە گوزارشتی لێ بکات.
لە لایەکی ترەوە، کەسانێک  هەن ڕەنگەکانی نامۆبوون دێنن و لە کەلتوورێکدا نوقمت دەکەن کە هی تۆ نیە و هەوڵ دەدەن کە باوەڕ بەوە بکەیت  کە ناسنامە ڕەسەنەکەت چیتر بەکەڵک نایەت. ئەمانە وات لێ دەکەن هەست بکەیت کە ئەم ئینتمایەی ئێستات بارگرانییە و ڕزگاربوون خۆی  لە تواندنەوە لە ناو ئەوڕەوتانە دەبینێت کە هیچ پەیوەندییەکیان بە تۆوە نیە. بەمشێوەیە، پەنجەکانی دەستت تێک دەئاڵێن ویەکتری دەشکێنن، وەک ئەوەی بچیتە ناو ملمێلانێیەکی ناوخۆییەوە لە نێوان ئەوەی تۆ کێیت، و ئەوەی دیانەوێت وەک ئەو بیت .
هەر وەک لە شانۆنامە پووچەکەی ساموێل بێکێتدا هاتووە ، هەندێکمان هەر چاوەڕێی گۆدۆ دەکەین،  چاوەڕێی ئەو کەسە یان ڕووداوە یان ڕزگارییەی کە وا دەزانین دێت و کۆتایی بە ئازارەکانمان دێنێت. بەڵام "گۆدۆ" نایەت، و لەوانەیە هەرگیز نەیەت. ئێمە لە گێژاوێکداین، چاوەڕێی شتێک دەکەین کە نازانین سروشتەکەی چییە و بڕیارەکانمان دوادەخەین لە چاوەڕوانی موعجیزەیەکدا کە لەوانەیە هەرگیز ڕوو نەدات.
چارەسەربە خۆبەستنەوەی کوێرانە بە ڕابردووەوە نیە، و نە لە خۆ خستنە  باوەشی نادیاریدا. بەڵکو لە داهێنانی ئینتمایەکی هۆشیاردایە، لەسەر بنەمای کردەوە و گەشەکردن نوێ ببێتەوە، نەک لەسەر لاساییکردنەوەی کوێرانە یان توانەوەی یەکجاری. پێویستە تێبگەین کە ئینتما  دروشم نیە، بەڵکو بەرپرسیارێتییە و گەڕان بەدوای خوددا نابێت لەسەر حیسابی ناسنامەکەمان بێت.
لە کۆتاییدا، ئەوەی هەر چاوەڕێی گۆدۆ دەکات، لەوانەیە تا هەتایە لە وەهمی چاوەڕوانیدا گیر بخوات لە کاتێکدا جیهان لە بەتەنیشتیا تێدەپەڕێت.