نەبەردییەکان هەر بۆ گێڕانەوە باشن

نەبەردییەکان هەر بۆ گێڕانەوە باشن 
ستران عەبدوڵڵا

لە بانێژەی خانەقای یەكێتی دانیشتبووین لە كەركوك. وەستا سابیر فەرماندە و پێشمەرگەی دێرین نەبەردییەكەی بە ئاماژە پێ نیشانداین، وتی لێرەوە لە هەمان ئەم شوێنەی رووی لە جادەی رەحیما ئاوا و رێگای هەولێر كە گێژاوێكی بۆ كەركوك نایەوە، پێکەوە لەگەڵ هەڤاڵان نەبەردییەكی یەكێتییانەمان تۆمار كرد. چۆن دەبێ دەست بۆ شوێنێك درێژ بكات لە ساڵی 2023 كەچی شەڕەكە لە 17-5-ی ساڵی (1986) قەوماوە؟ ئاخر بۆ پێشمەرگەیەك هەموو تەمەن و  وەختی لە نێوان نەبەردی و دانەیەكی ترە زەمەن راوەستاوەو كورت دەبێتەوە. تێكەڵ دەبێ و مانای وەختیان نامێنێ، تەنها مانای شەرەفمەندی تیایە لەو شوێنەی چالاكوانە مانگرتووە عەرەبەكان (ماشەڵڵا ماشەڵڵا لەم وەسفەی میدیای عێراقی!) خۆپیشاندانیان لە گۆڕەپانی بێگەرد و خالسی كورد دەكرد. وەستا گوتی: لەوێ نەبەردی قەوما و مەعلومە كە دژی سوپای بەعس و دارودەستەكەی بوو. ئەو كاتەی سیاسەت موقاوەمەت و خوێن بەخشین و نەعرەتەكەی ئازایەتی، بوو هەر یەكێتی هەبوو. هەر یەكێتی یەكلایدەكردەوە چونکە نرخی سیاسەتكردن بە رۆح و گیان و مان بوو. لە كوێ نرخ گرانتر بێت كامێرا و فلاش هیچی پێ تۆمار ناكرێت. بۆیە وەستا سابیر بە نامە نووسینێکی بۆ ناردم کە هەندێکی شایەتی هەڤاڵ راپەر عارفیشە لەسەر نەبەردییەکەی ناو جەرگەی رەحیماوە ، وەستا بە رۆح و چاوی دڵ و وەسفی دێر و حەرەف نووسیویەتی. ئەوی دوێنێ ئەمرۆ نەبوو و نییە تا (كامێرا و راستەوخۆ و نها و لایف) هەناسە و تاسە بگێڕێتەوە. ئەو كاتە خوێنی راستەوخۆ بوو قوڵپی دەدا. ئەوكاتە گوللە ئاگاهی و نها و بەپەلە بوو، بۆیە هەموو كەسێك نەدەبووە پێشمەرگە و هەموو كەسێكیش جورنالیست نەبوو راستییەکان وەکو خۆیان بوونە تۆمار بكات. زەمەن گۆڕاوە و كاغەزەکان تێكەڵ بووە دەنا بۆ دەبێ هەمان شەقام و هەمان دووڕیانی بارەگای یەكێتی بیگێڕێتەوەو شایەتێتی ئەوكاتیش هەر مەفرەزەیەكی ئازا و ئازادی یەكێتی شایەتی بن. هەر بۆ كورد زەمەن گۆراوە و دیموكراسی هاتووە و هەڵبژاردن تاوی سەندووە و خەڵك رای جیاوازی هەیە، دەنا بۆ نەیاران هەر یەك باسو خواسە، كورد لە رەحیماوە تێپەڕێ‌ دەستی فراوان دەبێ و شۆرجە جوابی دەداتەوە. بۆ نەیار چالاكوان بێت، یان شتی تر، ئەسڵ ئەوەیە كورد پێكوتە بكا و كورد كوت كوت بكرێت. زەمەنەكە دوو زەمەنی جیاوازە، وەستا سابیریش وەك ئێستا لەسەرخۆ نەبوو لە گێڕانەوە و دیقەتی باس كردن. فەقەت ئەوكاتەی نەبەردییەكە تۆمار دەكرا خۆی و هەڤاڵەکانی دەست و خەیاڵ واڵاتر بوون لە ئازایەتی و  بەرجەستەكردن. قسەی وەستا و هاوێکانی کردار بوون بۆیە زۆر نەبوو، بەڵام گێڕانەوەی ڕاستگۆیی بوو، وەک لە خواروتر  یاداشتم کردووە. قسەی من ماوە. بینووسن حزبێك نەبەردی 1986ی تۆمار كردوە هەر ئەو دەتوانێ لە تەنگژەی ئێستاش دەرمان بكا و دەریان بكات. باقێكەی وردكاری زیاد و سەربارە. یان وەك عەرەب دەڵێن
لزومیات ما لا یلزمە.
وەستا باسەکەی وەک بەشێک لە بیرەوەری بۆ ناردوم ، لە ژێر تایتڵی  
(هەوار هەر ئەو هەوارەیە، بەڵام بەهار ئەو بەهارە نییه) بە وردی نەبەردییەکە نووسراوە:( باسی هەڵمەتێکی کوت و پڕ و گورچک بڕیان کرد لە نێوان بازگەی کەرکوک ،هەولێری ئەوسا کە دەکەوتە بەر دەرگای مەکتەبی سیاسی ئێستای یەکێتی و پردەکەی ڕەحیماوە ).
بیرەوەری  ئێژێ (لە دامێن ،هێزەکە کرا بە دوو بەشەوە  کە ئەو بەشەی ڕووی کردە شوێنی ئێستای کولیەی زراعە بە سەرپەرشتی شەهید برایمەسور و کاک وەستا سابیر بوو کە ئامانجی لێدانی سەیتەرەکەو رەبییەکانی جێگای ئێستای خەستەخانەکەی شۆراو بوو .
بەشی دووەمی هێزەکە بە فەرماندەیی شەهید هیوا چیمەنی بەو شیو و دۆڵانەدا هاتینە خوارەوە کە دەهاتە سەر ئەو پردەی  لە نێوان لایف ستی و بارەگاکەی قیادەی عملیاتەوە بە ژێر جادەکەدا دەپەڕێتەوە بەرەو شۆراوی کۆن و عەرەفە کە ئێستا ژاژو بێشەیە .
ئەرکی ئەم هێزە کە بەندە شەرەفی ئەوەم پێ بڕا پێشمەرگەیەک بم لەم کاروانە ، ئەوە بوو کە ئەو هێزەی ڕژێم کە لە ناوشار و ڕێگای عەرەفەوە بە هاواری سەیتەرەکەوە دێت بکەوێتە بەر ڕەحمەت و گورزی پێشمەرگەوە .
ئەم هێزه بە فەرماندەیی شەهید هیوا چیمەنی و بەشداری هەڤاڵان حمەسور دوشیوانی ،ئاسۆسوور ، شەهید نقیب سیروان ،شەهید عەلی شوانی  هتد بوون کە بە داوای لێبوردنەوە چون لەمێژە ناویانم لە بیر نییە ،ئەم هێزە لە معمل سێوەکە تا نزیک پردەکەی ئێستای شۆراو دامەزرابوو.واتا هەمان جێگای خێمەکانی ئێستای مانگرتوان )
ئەم بڕگەیەم بە درێژی وەک خۆی گواستەوە چونکە خاریتەی نەبەردییەکەی جاران و کەینوبەینەکەی ئیعتیسامی مانگی نۆ دەگێڕێتەوە گوایە تەعریب بۆتە سیڤیل و مەدەنی و ئێمە بە خۆمان نەزانیووە. ئاخر ئەگەر  لەبەر ئاشتی و سەردەمی سیاسەت و دانوستاندن نەبێت یەکێتیی دەهێڵێ ئەم بوارە بێ بەهار بێت؟ و ئەم شەقامە بێ ناز و بێ ئیعاز بێت؟
گوێ لە گێرانەوەی داستانەکەی هێزی پێشمەرگە  بگرن لە رۆژی 17-5-1986
(لە گەڵ لێدانی سەیتەرەکە لە لایەن هەڤاڵانی لای شەهید مام برایم و وەستا سابیرەوە،  ئیتر دنیا بووە ئاگر باران و هێزەکەی ئێمەش لە بۆسەدا بوین و چاو لە سەر جاسوسی تفەنگ ،تا ئەوەبوو سعات یانزەی شەو هێزیکی زەبەلاحی دوژمن ، بە سیارە و پیادە ،لە جادەی ڕەحیماوەوە و لە ڕێگای عەرەفەوە بۆ هاواری هیزە گیر خواردوەکەیانەوە هاتن ،هەروەک چۆن ڕێنمایی درابوو ، کە پێشایی هێزەکە گەیشتە نزیک پردەکەی ئێستای شۆراو سەر و کلکی قوەتەکە کەوتە بە ڕەحمەتی کوڕە جەربەزەکانی ئەوسا و بە چاو تروکانێک توانەوە و فریای هاواریش نەکەوتن ،بە چاوی خۆم ئەمن و چەکداری سەر سیارەکانم دەدی وەک شوتی دەکەوتنە سەر ئەو ڕاسته شەقامەی ئێستاکە نەوەکانیان چادریان لێ هەڵداوە . دۆزەخێکیان بۆ داخرا کە مەگەر هەر ئەوان بزانن چ مەرگەساتێک بوو ؟)
بە نەفەسی سەرکەوتنەوە یاداشت دەڵێ؛
(وەک دانرابوو ئاوا جێبەجێ کرا ، ڕژێم ئەو شەوە وا پەشۆکابوو بۆ یەکەم جار فڕۆکەی مێک و سیخۆی ناردە سەر ئاسمانی ناوچە ،بەڵام پێشمەرگە چرنوکی لە هەناوی بەعس گیر کردبوو کە هەرگیز بڕوای نەدەکرد پێشمەرگە بگاتە ئەو شوێنە).

لەو شوێنی شانۆی بەسەرهاتەدا دوای ٣٧ ساڵ تەعریبەسازەکان لە سایەی دیموکراسی و فەزای هەڵبژاردندا، هەر بۆ ئەوەی هەڵبژرادنەکە پەکی کەوێت یان ئالودەبێت بە ترس و لەرز، خوێنی گەنجی کورد حەڵال دەکەن و مانگرتن لە مانای ئازادیخوازی خۆی بەتاڵ دەکەنەوە، پێشمەرگە و فەرماندەی دێرین وەستا سابیر هێشتا لە فەزای سەروەری و نەبەردیدنووسینەکەی وەتساپ دەڵێ؛ 
(بۆ دوو ڕۆژ دوای ئەو داستانه لە رێکخستنە نهێنیەکانی ناوشارەوە هەواڵمان بۆ هات، کارمەندیکی پۆلیسی حەریق کە کورد بوو ،بۆ بەیانی ئەو ڕۆژە بۆ پاککردنەوەی بن پردەکەی ئێستای ڕەحیماوە و جادەکە هێنرابوون ، وتبووی؛  
ئەو ڕۆژە تا دوای نیوەڕۆ ڕێگای هەولێر ،کرکووک داخرابوو ،بە جادەکەدا خوێن جۆگەلەی بەستبوو ، ئەو ناوە سورهەڵگەرابوو .
لێرە هەر ئەوەندە بەشی بیرەوەرییەکان دەگوازمەوە، سا بەڵکو وەستا سابیر  و هەڤاڵ راپەر و هەڤاڵەکانیان گشتی تەواو بکەن و بۆ نەوەکانی داهاتووی بگێڕنەوە. یان تێکۆشەرە دێرینەکان کە زۆر جار داستانێک باس دەکەن و لە حەسرەتی نائومێدیدا لە نیوەی رێگا و لە شەرم و  تەوازوعدا پارچە و کەرتی دەکەن و وازی لێدێنن، نەکا لای لاوەکان و نەوە تازەکان گێڕانەوەی پێویستی میژووی یەکێتیی وەک سەروەری شەخسی لەقەڵەم بدرێت.
پەند و وانە لە باسکردنی نەبەردییەکان بۆ ئەوە نییە کەس خۆی بکاتە شەریکی سەروەرییەکانی هەڤاڵانی دێرین ، یان لەمرۆ کە بوارەکە جیایە و وەرزەکەش پایزە و بەهار نییە داوا بکەین هەمان نەبەردی لە هەمان شوێن بەرجەستە و رەسم بکرێتەوە، کە ئەوە کۆمیدیایە ،بەڵکو دەرسەکە ئەوەیە ئەم داستانانە تۆمار بکرێن، شەهیدەکان سەربەرز بکرێن ، شەهیدە زیندووەکانی وەک شاهیدی مەلیک، وەک گێڕەرەوەی سەرفراز لە سەری هەموو مەجلیسێک دابنرێن، نەک هەر لەبەر حورمەت و رێزی شایستە و ئەلحەقی ، بەڵکو چونکە رێگەکەمان زۆری ماوە و تاریک وباریک و دژواری زیاتری تیایە و بۆ ئەمەش زاد و توێشی بەرەی زۆرمان گەرەکە. گەنجەکانی دوارۆژ هەر بۆ ئەوە باش نین لە باسی چەواشەدا دنەبدرێن ، بەڵکو بە شێوازی مۆدێرنی خەبات بەڵام بەهەمان گیانبازی هان بدرێن و تەیار بکرێن.