عیراق.. چه‌ند خۆپێشاندانێك له‌ ناوچه‌ جیاكانی به‌سره‌ و زیقار ئه‌نجامدرا

له‌ هه‌ردو پارێزگای به‌سره‌ و زیقاڕ، خۆپیشاندان به‌هۆی ناڕه‌زایه‌تی له‌كه‌می خزمه‌تگوزاریی و نه‌بونی دامه‌زراندن بۆ ده‌رچوانی زانكۆ و په‌یمانگاكان ئه‌نجامدرا .

به‌یانی ئه‌مڕۆ ده‌یان ده‌رچوی زانكۆ و په‌یمانگاكان خۆپیشاندان و ناڕه‌زاییان له‌ پارێزگای زیقاڕ ئه‌نجامدا و ژماره‌یه‌ك رێگای سه‌ره‌كی پارێزگاكه‌یان داخست له‌وانه‌ش پردی نه‌سڕ و زه‌یتونه‌ و ناوه‌ندی شاره‌كه‌ .

له‌لایه‌كی دیكه‌وه‌، هاوڵاتیانی قه‌زای سه‌ید ده‌خیلی رۆژهه‌ڵاتی شاری ناسڕیه‌، خۆپیشاندانێكیان له‌ ناوه‌ندی قه‌زاكه‌ ئه‌نجامدا و داوای ده‌ركردن و دورخستنه‌وه‌ی قائیمقامی قه‌زاكه‌یان كرد، هۆكاره‌كه‌شی بۆ خراپی ئاستی خزمه‌تگوزاریه‌كان ده‌گه‌ڕێننه‌وه‌ . 

هه‌ر به‌یانی ئه‌مڕۆ له‌ پارێزگای به‌سره‌، كارمه‌ندانی گرێبه‌ستی پاڵاوگه‌ی نه‌وتی شوعه‌یبه‌ گردبونه‌وه‌ی ناڕه‌زاییان ئه‌نجامدا و رێگای سه‌ره‌كی هاتوچۆیان بۆ كۆمپانیای نه‌وتی باشور داخست و داوایانكرد، بكرێن به‌ فه‌رمانبه‌ری هه‌میشه‌یی.