وتەبێژی فراکسیۆنی یەکێتیی وه‌ڵامى شاخه‌وان عه‌بدوڵڵا ده‌داته‌وه‌

دواى ئه‌وه‌ى شاخەوان عەبدوڵڵا جێگری دووەمی سەرۆکی ئەنجومەنی نوێنەرانی عیراق لەچاوپێکەوتنێکیدا لەگەڵ بەشی کوردی رادیۆی دەنگی ئەمریکا چه‌ند ڵيدوانێك ده‌دات ده‌رباره‌ى کێشەکانی پرۆسەی سیاسی عیراق و هەڵوێستی یەکێتیی نیشتمانیی کوردستان وتەبێژی فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق وه‌ڵامى ده‌داته‌وه‌ و ده‌ڵێت :
بەڕێز شاخەوان عەبدوڵڵا جێگری دووەمی سەرۆکی ئەنجومەنی نوێنەرانی عیراق، لەچاوپێکەوتنێکیدا لەگەڵ بەشی کوردی رادیۆی دەنگی ئەمریکا، هەندێ لێدوانی داوە، لەسەر کێشەکانی پرۆسەی سیاسی عیراق و هەڵوێستی یەکێتیی نیشتمانیی کوردستان، کە پێویستی بە هەڵوەستە لەسەرکردنە. 
١/ بەڕێز شاخەوان عەبدوڵڵا کە دەڵێ پۆستی سەرۆک کۆمار بەرکەوتەی پێکهاتەی کوردە، پێویستە بەڕێزیان ئەوە بزانن پۆستەکەی بەرێزیشیان بەرکەوتەی کوردە و نەدەبوو بەو جۆرە لایەندارییە حزبییە زەقە قسە بکات. 
٢/ ئەم قسانەی بەڕێز شاخەوان عەبدوڵڵا لەکاتێکدایە کە هەموو هێزە سیاسیەکانی عیراق بەئاراستەی چارەسەر و هێوربوونەوە کار دەکەن، ئەم قسانەی پێچەوانەی پەیامی سەرکردە باڵاکانی حزبەکەیەتی کە بۆ گفتوگۆ و چارەسەر بڵاوی دەکەنەوە. 
٣/سەبارەت بەوەی کە بەرێز شاخەوان عەبدوڵڵا چوارچێوەی هەماهەنگی بەوە تاوانبار دەکات کە نێوانی یەکێتی و پارتی تێکداوەو یەکێتی «ئیغرا» کردووە بە پۆستی سەرۆک کۆمار. هەموولایەک دەزانن کە پارتی دەستپێخەری کرد لەوەی بچێتە ناو هاوپەیمانی سێقۆلی و کێشەکانی نێوماڵی شیعە و کوردیشی قووڵکردەوەو بەبێ رێکەوتنی یەکێتی و پارتی پۆستی جێگری دووەمی سەرۆکی ئەنجومەنی نوێنەران وەربگرن و کاندیدی سەرۆک کۆمار تۆمار بکەن و ئەوە پارتی بوو تەماحی لەپۆستی سەرۆک کۆمار کرد کە بەرکەوتەی کورد و یەکێتی یە و تاکلایانانە لەگەڵ رەوتی سەدر بۆ پۆست رێککەوتنی ئیمزا کرد بەبێ ئەوەی یەک خاڵی لەبەرژەوەندی هەرێمی کوردستان تێدا بێت، یەکێتی هێزێکە بە هیج دەستکەوت و پۆستێک ئیغرا نابێ و رێگەی نەدا هیچ لایەنێک ئیرادەی خۆی بەسەریدا بسەپێنێت.
٤/ لە قسەکانیدا بەرێز شاخەوان عەبدوڵڵا دەستەواژەی «کەمینە»ی بۆ یەکێتی بەکارهێناوە، ئەم دەستەواژە و دەربڕینانە بۆ هیچ هێزێکی سیاسی گونجاو نییە بەکاربهێنرێت، بەتایبەت بۆ هێزێکی وەک یەکێتی کە ژمارەی شەهیدەکانی زیاتر لە بیست هەزار شەهیدە، سیاسەت و پێگە و سەنگی یەکێتی لە عیراقدا بە قسەی هیج کەسێک نادیدە ناگیرێ. 
٥/ بەڕێز شاخەوان عەبدوڵڵا بەناوی بەڕێزان لە ڕەوتی سەدرەوە قسە دەکات، لە کاتێکدا بەرێزیان ئێستا جێگری سەرۆکی ئەنجومەنی نوێنەرانن و گونجاو نییە بەناوی کەس و لایەنی ترەوە قسە بکات. 
سەرباری ئەو جۆرە لێدوانانە، کە ناهەقین بەرامبەر بە یەکێتی، لەروانگەی بەرپرسیارێتیەوە، یەکێتی جەخت لەبژاردەی گفتوگۆ و چارەسەر دەکاتەوە لەئاستی نێوماڵی کوردی و لەئاستی هەموو هێزە سیاسیەکانی عیراق، بۆ کۆتاییهێنان بە گرژییە سیاسییەکان و بنبەستی سیاسی. 

وتەبێژی فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق 
٣/٨/٢٠٢٢