بازرگانیی عیراق ده‌یه‌وێت نرخی خۆراك له‌ بازارە‌كان رێكبخات

محه‌مه‌د حه‌نون وته‌بێژی وه‌زاره‌تی بازرگانیی عیراق رایگه‌یاند: له‌سه‌ر رێنمایی ئه‌نجومه‌نی وه‌زیران بۆ رێكخستنه‌وه‌ی نرخی مادده‌ خۆراكه‌ بنچینه‌ییه‌كان، لیژنه‌یه‌كی وزرای دروستكراوه‌ كه‌ نوێنه‌ری شه‌ش فه‌رمانگه‌ی تێدا به‌شدارن بۆ دیاریكردنی نرخی مادده‌ خۆراكییه‌كان.

باسیله‌وه‌شكردووه‌: لیژنه‌كه‌ پشت به‌ نرخی جیهانیی مادده‌كان و كرێی گواستنه‌وه‌ی وشكانی و ئاوی ده‌به‌ستن، به‌شێوه‌یه‌كی ورد لیژنه‌كه‌ ده‌یانه‌وێت، وردبینی و هه‌ماهه‌نگی له‌گه‌ڵ وه‌زاره‌ته‌كانی پلاندانان و كشتوكاڵ و پیشه‌سازییدا بكه‌ن و ده‌یانه‌وێت سه‌قامگیری ئابوری له‌ بازارە‌ ناوخۆییه‌كانی عێراقدا دروست بكه‌ن.

ڕوونیشیكرده‌وه‌، تیمی به‌دواداچوونی بازارە‌كانی سه‌ر به‌ وه‌زاره‌تی بازرگانی به‌ هاوكاری لایه‌نه‌ ئه‌منییه‌كان، رۆژانه‌ به‌دواداچوون بۆ نرخی بازاڕی ناوخۆیی ده‌كه‌ن و  راپۆرت بۆ دیوانی سه‌رۆكی ئه‌نجومه‌نی وه‌زیران و بۆ لایه‌نه‌ په‌یوه‌ندیداره‌كان ئاماده‌ ده‌كه‌ن و  چاودێری هه‌ر به‌رزبوونه‌وه‌ی نرخێك ده‌كه‌ن و رێوشوێنی گونجاویش ده‌گرنه‌به‌ر.