لەنیوەی یەکەمی ئەمساڵدا بەهاوئاهەنگی لەگەڵ دەزگا ئەمنییەکانی هەرێم 11 تیرۆرستی داعش دەستگیرکراون

دەزگای بەرەنگاربوونەوەی تیرۆر ئۆپەراسیۆنە هاوبەشەکانی لەگەڵ هەرێمی کوردستان بڵاوکردەوە و ڕایگەیاند، ١١ تیرۆریست لەسەر ئاستی سەرکردایەتی جیاواز لە ماوەی نیوەی یەکەمی ئەمساڵدا دەستگیرکراون.
سەباح ئەلنوعمان، وتەبێژی دەزگای بەرەنگاربوونەوەی تیرۆر بە ئاژانسی هەواڵی عێراقی ڕاگەیاند: لە ماوەی نیوەی یەکەمی ئەمساڵدا ژمارەی ئەو تیرۆریستانەی بە هاوئاهەنگی لەگەڵ هەرێم دەستگیرکراون گەیشتە 11 تیرۆریست‌.
ڕوونیشیکردەوە ‌هاوئاهەنگی نێوان دەزگای بەرەنگاربوونەوەی تیرۆر و دەزگای هەواڵگری لە هەرێمی کوردستان بەردەوامە و ئەمەش بووەتە هۆی سەلامەتی لە ناوچەی لە سنوورەکانی هەرێم و ناوەند.
ئاماژەی بەوەشکرد ‌له‌ماوەی ڕابردوو ئۆپەراسیۆنی هاوبەش له‌نێوان دەزگاکە و هەرێم لە ناوچەی سنوورییەکان کراوە و تێیدا کۆمەڵێک کۆگا دۆزرایەوە و بە پاڵپشتی هێزی ئاسمانی عێراق تێکشکێنران.
وتیشی ئەو هاوئاهەنگییە لەگەڵ هەرێم بووە هۆی بڕینی ڕێگای تیرۆریستان و ئازادی هاتوچۆیان و زانیاری هەواڵگریی ورد و ئۆپەراسیۆنەکان هەر هەوڵێکی تیرۆریستییەکانی داعشی بۆ هەڕەشەکردن لە ئاسایشی ناوچەکە، پووچەڵکردووەتەوە.