سەدر: دەبێت گروپە چەكدارەكان چەكەكانیان دابنێن

سەركردەی رەوتی نیشتمانی شیعەكان لە عیراق سەبارەت بە گرووپە چەكدارەكان داوا دەكات سەرجەمیان چەك دابنێن و هەڵبوەشێندرێنەوە.
موقتەدا سەدر، سەركردەی رەوتی نیشتمانی شیعە سووربوونی خۆی لەسەر بایكۆتی هەڵبژاردنی ئەنجومەنی نوێنەرانی عیراق دووپات كردەوە و پێداگری كرد لەسەر هەڵوەشانەوەی گرووپە چەكدارەكان و تەسلیمكردنەوەی  چەكەكانیان، لەگەڵ ئەوەشدا باسی لە پێویستی بەهێزكردنی سوپا و پۆلیس و سەروەری و سەربەخۆیی عیراق كردووەتەوە. هاوكات موقتەدا سەدر ئاماژەی بەوەشدا، بە هۆی گەندەڵی و خەڵكی گەندەڵەوە، عیراق دواهەناسەكانی خۆی تاقی دەكاتەوە.
هەروەها موقتەدا سەدر لە وەڵامی یەكێك لە لایەنگرانی خۆی لەبەرامبەر بەشداریكردن لە هەڵبژاردنی داهاتووی ئەنجومەنی نوێنەرانی عیراق ڕایگەیاندووە: بە هەموو لایەك ڕادەگەیەنم كە هەتا ئەو كاتەی گەندەڵی هەبێت من بەشداری لە هەڵبژاردنێك ناكەم كە لە بەرژەوەندی لایەنێك و پارتێكدا بێت.