دەستەی دەستپاکی گەندەڵییەکی گەورە لە فەرمانگەی تەندروستی کەرکوک ئاشکرادەکات

دەستەی دەستپاکی عێراق، گەندەڵییەکی گەورە لە فەرمانگەی تەندروستی کەرکوک ئاشکرادەکات.
دەستەی دەستپاکی عێراق، لە بەدواداچوونێکدا بۆی ئاشکرابووە لە گرێبەستی کڕینی ئامێرە پزیشکییەکاندا لە فەرمانگەی تەندروستی کەرکوک بە بەهای نزیکەى نیو ملیار دیناری عێراقی، گەندەڵی کراوە.
دەستەکە لەڕاگەیاندراوێکدا لەبارەی دۆسییەکەوە دەڵێت، بابەتەکە پەیوەندی بە گرێبەستی کڕینی ئامێرە پزیشکییەکانەوە هەیە کە بە بەهای ٤٤٧ ملیۆن و ٩٨٠ هەزار دیناری عێراقی دیار نەماوە.
دەستەکە ڕاشیگەیاندوە، گەندەڵییەکان لەو گرێبەستانە ئەنجامدراون کە بۆ دابینکردنی ئامێری پزیشکی ئەنجامدراون .
دەستەی دەستپاکی دەشڵێت، تەندروستی کەرکوک بۆ دابینکردنی 10 ئامێری تایبەت بە نەشتەرگەری و نازور، گرێبەستێکی بە بڕی 287 ملیۆن و 500 هەزار دینار ئەنجامداوە، لەکاتێکدا ئامێرەکان خراپترین کوالێتیان هەیە .
ئەوەشی ئاشکراکردووە، گرێبەستێکی دیکە بەبڕی 63 ملیۆن دینار بە پێچەوانەی رێنماییەکان کراوە و بەبێ پلانیش ئەنجامدراوە، لەلایەکی دیکەوە بەبڕی 88 ملیۆن دینار ئامێری کیمیا لەنوسینگەیەک کڕدراوە لەکاتێکدا لیژنەی راوێژکاری رایسپاردوون لەکۆمپانیایەکی دیکە بیکڕن.
دەستەی دەستپاکی بۆشی دەرکەوتووە، لەکەرتی تەندروستی حەویجە، گەندەڵی سەیروسەمەرە ئەنجامدراوە و دەستکاری پسوڵەی کڕینی پێداویستی پزیشکی کراوە و 7 هەزار و 900 پارچەی پزیشکی کراوەتە 79 هەزار پارچە .