جەبار یاوەر: داعش لەرووی سەربازییەوە توانی دەستبەسەردا گرتنی هیچ ناوچە و شارێکی نەماوە

بەرپرسێكی پێشووی وه‌زاره‌تی پێشمه‌رگه‌ی حكومه‌تی هه‌رێم سەبارەت بە هەڕەشە و مەترسییەكانی داعش بۆ سەر ناوچەكانی عێراق و هەرێمی كوردستان ده‌ڵێت، تواناکانی داعش زۆر کەمبووەتەوە .
جەبار یاوەر، ئەمینداری پێشووی وەزارەتی پێشمەرگەی حکومەتی هەرێمی کوردستان به‌ ده‌نگی ئه‌مریكای راگه‌یاند: داعش ئێستا رێکخراوێکی تیرۆریستی جیهانی جێی مەترسییە، هەم لە رووی فکری و هەم لە رووی سەربازییەوە، بەڵام تواناکانی زۆر کەمبووەتەوە و بەراورد بە ساڵی 2014 تواناکانی، زۆر لاوازبووە، بەراوردی توانای هێزەکانی عێراقی و پێشمەرگەش بە ساڵی ٢٠١٤ زۆر جیاوازە و ئەوەندەی تر داعش لە بەرامبەر توانای ئێستای ئەم هێزانە لاوازە.
وتیشی، "ئەو پڕوپاگەندە و هەڵایانەی ئێستا دروستکراون سەبارەت بە مەترسی داعش لەسەر موسڵ، من وەک شارەزایەکی سەربازی قسە دەکەم، حەقی بابەتی سیاسیم نیە، لە ئێستادا داعش هیچ مەترسی نیە نە بۆ دەستبەسەرداگرتنی موسڵ نە هیچ جێگایەکی تر".