بەغداد نیوەی کارەبای بەرهەمهێنراوی عیراق بەکاردەهێنێت

سەرۆکی رێکخراوێکی ئابووریی عیراقی رایگەیاند، بەهۆی زۆری باڵەخانەکان و خراپی سیستمی گەرمی و ساردیییەوە، بەغدا نزیکەی 50%ـ ی کارەبای بەرهەمهێندراوی عێراق بەکاردەهێنێت.

خالید جابری، سەرۆکی رێکخراوی ئوسوڵ بۆ پەرەپێدانی ئابووری و بووژاندنەوەی بەردەوام رایگەیاند، بەپێی ئەو رووپێوییانەی لە بەغدا کراون، بەغدا نزیکەی 50%ـ ی کارەبای بەرهەمهێنراوی عێراق بەکاردەهێنێت.

وتیشی یەکێک لە هۆکارەکانی بەکارهێنانی ئەو بڕه‌ کارەبایە لە بەغدا ئەوەیە؛ زۆربەی باڵەخانەکانی سیستمی پێشکەوتووی ساردی و گەرمییان تێدا نییە، ئەوەش وا دەکات زیاتر پێویستییان بە کارەبا بێت.

بەگوێرەی دوایین ئاماری وەزارەتی کارەبا، بڕی کارەبای بەرهەمهێندراوی عیراق 27هەزار مێگاواتە، لەکاتێکدا هاوینان عێراق پێویستی بە زیاتر لە 48 هەزار مێگاواتە.

بەغدا لە رووی رووبەرەوە بچووکترین پارێزگای عێراقە، بەڵام چڕیی دانیشتووانەکەی زۆرە و زیاتر لە نۆ ملیۆن کەسی تێدا دەژی و زیاتر لە 13 هەزار مێگاوات کارەبا بەکاردەهێنێت.