بارسا لە نیکۆ بێ ئومێدبووە ئێستا رووی لە ئۆلمۆیە

بارسا لە نیکۆ بێ ئومێدبووە ئێستا رووی لە ئۆلمۆیە
ئاکۆ بیبانى
گەرمترین بابەتى مێرکاتۆ گواستنەوەى ئەو دوو ئەستێرەیەى هەڵبژاردەى ئیسپانیایە بۆ یانەى بارسیلۆنا و هەموانیان بەخۆیانەوە سەرقاڵ کردوە ، رۆژنامە و کەناڵەکانى راگەیاندن و سۆشیال میدیا هەمووى هەواڵى گواستنەوەى دانى ئۆلمۆ و نیکۆ ولیامزە بۆ ریزەکانى یانەى بارسیلۆناى کەتەلۆنى .
لە دوای کۆتایی هاتنى یارییەکانى یۆرۆ و پاڵەوانبوونى لارۆخا ، فۆکسێکى زۆر لەسەر یاریزانانى هەڵبژاردەى ئیسپانیایە بەوپێیەى ئاستى بەرز و سەرنج راکێشیان پێشکەش کرد، یەکێک لەو یاریزانانەى چاوى یانە کەتەلۆنییەکەى چووە سەر نیکۆ ولیامز بوو ، دوای مشتومڕێکى زۆر پێ دەچێت یاریزانەکەى ماتادۆر لە یانەى ئەتلەتیک بلباو بمێنێتەوە ئەمە جگە لەوەى ئیدارەى یانەى پاریس سانجێرمانیش بۆندێکى زەبەلاح و گەورەى بۆى ئامادەکردوە ، بەهەموو پێوەرەکان نیکۆ لە ئێستادا دوورە لە کامپ نۆوە .
دوای ئەوەى لە یارییەکانى یۆرۆ بووە گۆڵکارو سێ گۆڵى تۆمارکردو دوو گۆڵى دروستکرد ، دانى ئۆلمۆ بووە جێگاى سەرنجى یانەى بارسا و ئەو یانەیەش ئامادەیە قوربانى بدات لە پێناو دەستەبەرکردنى تواناکانى ، یاریزانەکەى لایبزییگیش خواستێکى زۆرى هەیە بۆ ئەوەى لە ریزەکانى یانەى بارسیلۆنا یارى بکات و ئەوەشى نەشاردۆتەوە خەون بەوەوە دەبینێت کە درێسى یانەکە بپۆشێت .
بەپێی وتەی فابریزیۆ ڕۆمانۆی ڕۆژنامەنووسی وەرزشى متمانەپێکراوی ئیتاڵی و پسپۆڕ لە گواستنەوەى یاریزانان ، ئۆلمۆ ئەولەویەت دەدات بە بلوگرانە، هەروەها ئامادەیە ئەو مەرجانە قبوڵ بکات کە یانەکە پێشکەشی کردووە سەبارەت بەو گرێبەستە .
ڕۆمانۆ لە ڕێگەی ئەکاونتەکەیەوە لە “X” ڕوونیکردۆتەوە  دانى ئۆلمۆ بە توندی ئارەزووی گواستنەوەی بۆ بارسا دەکات، لەگەڵ گفتوگۆ ئەرێنییەکان لە کۆتایی هەفتەی ڕابردوو و هەروەها لەم هەفتەیەدا بەردەوامن.
فابریزیۆ ئاماژەی بەوەشکرد، بارسێلۆنا و لایپزیگ لە پەیوەندیدان بۆ گفتوگۆکردن لەسەر بابەتە داراییەکانی پەیوەست بە ئەگەری گواستنەوەی ئۆلمۆ.
ئۆلمۆ تەمەنی 26 ساڵە و تا هاوینی 2027 گرێبەستی لەگەڵ لایپزیگ هەیە.