ئیسرائیل کوژرانی فەرماندەی کەتیبەکانی قەسام رادەگەیەنێت

سوپای ئیسرائیل کوژرانی محەممەد زەیف، لێپرسراوى باڵی سەربازیی بزووتنەوەی حەماس و رافع سەلامە، فەرماندەی لیوای خان یونسی پشتڕاستکردەوە، ئەوەش دوای ئەوەی هەفتەی پێشوو لە کەرتی غەززە بەئامانجگیران.

سوپای ئیسرائیل لە راگەیەندراوێکدا بڵاویکردەوە، دڵنیابوونەتەوە لە کوشتنی محەمەد زەیف، ئەوەش دوای ئەوەی هەفتەی رابردوو ئیسرائیل هێرشی کردەسەر کەمپی مەواسی لە خان یونس و وتی، "هێرشەکە بەمەبەستی بەئامانجگرتنی محەمەد زەیف بووە".

رۆژی 14ـی ئەم مانگە، هێزی ئاسمانیی ئیسرائیل بەچڕی هێرشی کردەسەر چەند شوێنێک لە غەززە، بەوتەی لێپرسراوانى وڵاتەکە ئامانجی هێرشەکە ناوچەی ئەلمەواسی رۆژئاوای خان یونس لە باشووری کەرتی غەززە بووە و بۆ لەناوبردنی محەمەد زەیف، فەرماندەی لیواکانی ئەلقەسام بوو.

رافع سەلامە، فەرماندەی لیوای خان یونس یەکێکی دیکە بوو لە ئامانجەکانی هێرشەکەی ئیسرائیل، دوای بۆردوومانەکە وەزارەتی تەندروستی غەززە بڵاویکردەوە، "لە هێرشەکەدا بۆسەر کەمپی ئاوارەکانی مەواسی 71 کەس کوژراون و 289 کەسیش برینداربوون".