داوای دانانەوەی بازگەی گومرگیی لەنێوان کەرکوک و هەرێمی کوردستان دەکرێت

ژووری بازرگانیی کەرکوک داوای دانانەوەی بازگەی گومرگیی لەنێوان پارێزگای کەرکوک و پارێزگاکانی هەرێمی کوردستان دەکات و سێ پێشنیاز ئاراستەی پارێزگاری کەرکوک دەکات
بەگوێرەی پێشنیازەکانی ژووری بازرگانیی کەرکوک، بازگەیەکی گومرگیی لەسەر رێگای کەرکوک - هەولێر، لەنێوان ناحیەی پردێ و کەرکوک دابنرێت، تاوەکو باج لەو بارهەڵگرانە وەربگیرێت کە لە دەروازەی ئیبراهیم خەلیل هاتوونەتە خاکی عێراق و بە پارێزگای کەرکوکدا دەچنە پارێزگاکانی ناوەڕاست و باشووری عێراق.
هەر لە پێشنیازەکاندا هاتووە، بازگەی گومرگی لەسەر رێگای کەرکوک - سلێمانی لەنێوان ناحیەی قەرەهەنجیر و کەرکوکدا دابنرێت، بۆ ئەوەی باج لەو بارهەڵگرانە وەربگیرێت کەلوپەل لە دەروازەی باشماخەوە دەهێننە خاکی عیراق و بە پارێزگای کەرکوکدا دەیگوازنەوە.
ژووری بازرگانیی کەرکوک داواشدەکات، مۆڵەتی شەش مانگ بدرێت بە خاوەنی کارگەکانی هەرێمی کوردستان تاوەکو خۆیان لە یەکێتیی پیشەسازیی عێراق تۆماربکەن.