شێخ جەعفەر شێخ مستەفا: دەبێت هەمووان كار بۆ بەهێزتركردنی یەكێتی بكەین

شێخ جەعفەر شێخ مستەفا: لەپێناو سەربەرزی و پاراستنی كەرامەتی هەمووان و ئارامی دەبێت هەمووان كار بۆ بەهێزتركردنی یەكێتی بكەین

ئەمڕۆ چوارشەممە (7ی ئابی 2024) شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان، پێشوازیكرد لە لێپرسراو و كادرانی كۆمیتەی 5ی رێكخستنی توی مەلیكی یەكێتی نیشتمانی كوردستان.
لەسەرەتای کۆبوونەوەکەدا، لێپرسراوی ئەنجومەن، پشتیوانی خۆی بۆ لێپرسراوو كادرانی كۆمیتە دەربڕی لەئیشوکارە حزبییەکاندا، پاشان تیشكی خستەسەر دۆخی گشتی هەرێم‌و دوا پێشهاتەكانی پەیوەست بە خۆئامادەکردن و خۆسازدان بۆ پرۆسەی هەڵبژاردنی پەرلەمانی كوردستان و هەڤاڵانی یەکێتی هاندا بۆ هاوکاری و پابەندبوون بەو پێویستیانەی کۆمیسیۆنی باڵای سەربەخۆی هەڵبژاردانەکان بۆ سەرخستنی پرۆسەی هەڵبژاردن دیاریان دەکات، هەروەک بە بایەخەوە تیشكی خستەسەر بایەخی پرۆسەكە‌و رایگەیاند: ئەم هەڵبژاردنە بۆ یەكێتیی نیشتمانیی كوردستان گرنگەو دەبێت هەمووان كار بۆ سەرخستنی لیستەكەو كاندیدانی یەكێتی بكەین، تا بتوانین زۆرترین كورسی پەرلەمان مسۆگەر بكەین، وتیشی: ئەمەش پێویستی بەهەوڵ و ماندووبوون و قوربانیدان هەیەو دەبێت هەر یەكێكمان لای خۆمانەوە كار بۆ یەكێتی بكەین و هەوڵبدەین زۆرترین دەنگدەر بنێرینە سەر سندوقەكانی دەنگدان.
هاوكات ئاماژەی بۆ ئەوەكرد كە پێویستە ژنان رۆڵێكی گرنگ و كاریگەر بگێڕن لەم پرۆسەیەدا، هەروەك چۆن لە رابردوودا لەنێو ریزەكانی یەكێتیدا و لەتەواوی كارو چالاكییەكاندا رۆڵی بەرچاویان هەبووەو بەردەوامیش پێگەو سەنگیان كاریگەربووە.
لەبەشێكی تری كۆبوونەوەكەدا ، تەئكیدیكردەوە، لەپێناو سەربەرزی و پاراستنی كەرامەتی هەمووان و سەقامگیری و ئارامی دەبێت كاربكەین بۆ بەهێزتركردنی یەكێتی و سەرخستنی یەكێتی لەم هەڵبژاردنەدا، ئەمەش پێویستی بەهەوڵ و ماندبوون و كاركردن هەیە، دڵنیایشیدا كە بەهەوڵ و هیممەتی هەموولایەك دەنگەكانی یەكێتیی نیشتمانیی كوردستان لەم هەڵبژاردنەدا باشترو زیاتر دەبێت.