سەرۆکایەتی کۆماری عیراق: یاسای هەڵبژاردن هەموار ناکرێتەوە

سەرۆکایەتی کۆماری عێراق ڕەتیدەکاتەوە کە نیازی هەموارکردنەوەی یاسای هەڵبژاردنی هەبێت و رایدەگەیەنێت: دەنگۆی لەو جۆرە لەسۆشیاڵ میدیاو لەسەر زاری ژمارەیەک کەسایەتییەوە بڵاوکراتەوە، کە گوایە سەرۆکایەتی کۆمار بەڕەزامەندی هاوپەیمانیی چوارچێوەی هەماهەنگی نیازی ئامادەکردنی پرۆژەیاسای هەموارکردنەوەی هەڵبژاردنی هەبێت.
سەرۆکایەتیی کۆمار لەڕاگەیەندراوێکیدا ئەو جۆرە هەواڵە هەڵبەستراوانە رەتدەکاتەوە و دەڵێت: ئەو هەواڵانە ڕاستــنیین و ئامانجەکەی بۆ پشێوینانەوەیە لەگۆڕەپانی سیاسییداو ناچارین ئەوانە رووبەرووی دادگا بکەینەوە کە ئەو دەنگۆیانە لەسەر حسابی ئاشتی و ئارامی  هەمووان بڵاودەکەنەوە.
سەرۆکایەتی کۆمار رایدەگەیەنێت: کاردەکەین بۆ نزیککردنەوەی بۆچوونی لایەنە بەشداربووەکانی نێو پرۆسەی سیاسیی  بەئامانجی پێشکەشکردنی باشترین خزمەتگوزاری بۆ هاوڵاتییان و جێبەجێکردنی  بەڵێنەکانی حکومەت کە لەکارنامەکەیدا بەهاوڵاتییانی داوە.