لیژنەی ئاسایش و بەرگریی: لە 80%ـی هەوڵەکانی قاچاخچێتی دراو کۆنترۆڵ کراوە

لیژنەی ئاسایش و بەرگریی لە ئەنجوومەنی نوێنەرانی عێراق رایگەیاند، "لە ئەنجامی بەردەوامیی هەوڵەکانی بانکی ناوەندی و وەزارەتی ناوخۆ، لە ئێستادا 80%ـی هەوڵەکانی قاچاخچێتی دراو کۆنترۆڵ کراوە.
لیژنەکە دەشڵێت، "بە دیجیتاڵکردنی مامەڵە داراییەکان لە بانکەکانی عێراق، هۆکارێکە بۆ بەرزکردنەوەی سەقامگیریی ئابووری و کەمکردنەوەی مەترسییەکانی قاچاخچێتیی دراو لە وڵاتدا، چونکە قاچاخچێتیی دراو و سپی کردنەوەی پارە بەهەموو شێوەکانی، کاریگەری لەسەر ئابووری وڵات دروست دەکات و زیانی پێدەگەیەنێت، هۆکارێکیشە بۆ فشارخستنە سەر بازاڕەکان و بەرزبوونەوەی نرخی دراوەکان لە بازاڕدا".
ئەوەشی خستووەتەڕوو، پێویستە هەوڵەکان چڕتر بکرێنەوە تاوەکو بە تەواوی و بەڕێژەی 100% رێگری لەو قاچاخچێتییە بکرێت.
جەخت لەوەشکراوەتەوە، بەدیجیتاڵکردنی مامەڵە داراییەکان لە بانکە عێراقییەکان یارمەتیدەر دەبێت لە بەرزکردنەوەی سەقامگیریی ئابووری و کەمکردنەوەی مەترسییەکانی پەیوەست بە سپیکردنەوەی پارە و قاچاخچێتیی دراو.