لە عیراق رێژەی کارکردن بە منداڵان زیادی کردووە

وەزارەتی کار و کاروباری کۆمەڵایەتیی عێراق بڵاوی کردووەتەوە ڕێژەی کارکردنی منداڵان لە بەغدا و پارێزگاکانی دیکەی عێراق لە چەند ساڵی ڕابردوودا زیادی کردووە، بۆ سنووردارکردنی ئەو دیاردەیەش حکومەت ڕێکاری یاسایی دژی خاوەن کارەکان دەگرێتەبەر.
بەپێی ڕاپۆرتەکانی ڕێکخراوەکانی مافی مرۆڤ و حکومەتی عێراقیش، ژمارەی ئەو منداڵانەی کار دەکەن ڕوو لە زیادبوونن و هەژاری و نەبوونی و خراپی بارودۆخی ئابووری هۆکاری سەرەکی ئەو دیاردەیەن.
لەوبارەیەوە نەجم ئەلعیقابی، وتەبێژی وەزارەتی کار و کاروباری کۆمەڵایەتی ڕایگەیاند: لە دوو ساڵی ڕابردوودا ڕێژەی کارکردنی منداڵانی ژێر 18 ساڵی زیادی کردووە و بەشێکیشیان کاری قورس دەکەن.
نەجم عیقابی جەختی لەوەش کردەوە ئەو خاوەن کارانەی کار بە منداڵانی ژێر 18 ساڵی دەکەن ڕێکاری یاسایی بەرامبەریان دەگرێتەبەر.
بە گوێرەی سەنتەری عێراق بۆ مافەکانی مرۆڤ، زیاتر لە 700 هەزار منداڵ لە عێراق کار دەکەن.