بەرپرسانی ئەمریکا: پێدەچێت ئیسرائیل وەڵامی راستەوخۆی ئەو هێرشانە بداتەوە کە لەعێراقەوە دەکرێن

چەند بەرپرسێکی باڵای ئەمریکا رایانگەیاند، هێرشی درۆنی لە عێراقەوە بۆ سەر ئیسرائیل زیادیکردووە و پێدەچێت ئیسرائیل وەڵامی راستەوخۆی ئەو هێرشانە بداتەوە.
دوو بەرپرسی باڵای ئەمریکا کە نەیانویستووە ناویان بهێنرێت، بەئاژانسی ئەسۆشیەیتد پرێسیان راگەیاندووە، لە چەند هەفتەی رابردوودا، رۆژانە لانیکەم پێنج هێرشی درۆنی لە عێراقەوە بۆ سەر ئیسرائیل ئەنجامدراوە، ئەمریکا و هاوپەیمانەکانی ناچاربوون بەشێک لەو درۆنانە بخەنە خوارەوە پێش ئەوەی بگەنە خاکی ئیسرائیل.
راشیانگەیاندووە، هێرشەکان لەلایەن "گرووپەکانی سەر بە ئێرانەوە" ئەنجامدەدرێن و پێدەچێت سوپای ئیسرائیل وەڵامیان بداتەوە.
لەماوەی هەفتەی رابردوودا، لە عێراقەوە هەشت هێرشی درۆنی بۆ سەر ئیسرائیل ئەنجامدراوە و بەرەی مقاوەمەی ئیسلامییش بەرپرسیارێتیی خۆی لە ئەنجامدانی ئەو هێرشانە دەربڕیوە.