سێ یەکەمە دەرچووەکان داوای دامه‌زراندن ده‌كه‌ن

سێ یەکەمە دەرچووەکانی زانکۆ و پەیمانگانای هەرێمی کوردستان داوای دامەزراندن لە حکومەت دەکەن و دەڵێن: "ژمارەمان زیاتر لە 9 هەزار کەسە و مافی خۆمانە دابمەزرێین".


"پڕۆسەی دامەزراندن جێبەجێ بکرێت"
ئەمڕۆ دووشەممە 4ـی 11ـی 2024، بەشێک لە سێ یەکەمە دەرچووەکانی زانکۆ و پەیمانگاکان لە سلێمانی کۆنگرەیەکی رۆژنامەوانییان ئەنجامدا و رایانگەیاند: "داواکارین لە حکومەت بە زووترین کات پڕۆسەی دامەزراندنی سێ یەکەمەکان جێبەجێ بکات، داوای وەرگرتنی مافی خۆمان دەکەین و دژی هیچ کەس و لایەنێک قسە ناکەین".

"دژی دامەزراندنی هیچ چین و توێژیک نین، بەڵام هەر دامەزراندنێک لە زانکۆوە بکرێت ئێمە وەک سێ یەکەمەکان بە مافی خۆمانی دەزانین"، "ژمارەمان 12 هەزار و 286 کەس بوو، بەڵام دوای پڕۆسەی بایۆمەتری ژمارەمان بووە بە 9 هەزار"، سێ یەکەمە دەرچووەکان وایان وت.


دەرگای سەرۆکوەزیران بەڕوویاندا ناکرێتەوە
رۆژی 23ـی 9ـی 2024، دەرچووە یەکەمە دانەمەزراوەکان لە بەردەم ئەنجومەنی وەزیران بۆ جاری 35ـەم خۆپیشاندانیان ئەنجامدا و داوای بینینی سەرۆکوەزیرانی هەرێمیان کرد، بەڵام دەرگای ژووری سەرۆکوەزیران و دامەزراندیان بەروودا داخرا.

پێشتر نوێنەری ئەو دەرچووانە لە کۆنگرەیەکی رۆژنامەوانیدا رایگەیاند: "ئەگەر دەرگامان بەروودا نەکەنەوە ئەوا ناچارین هەڵوێستی دیکە بگرینەبەرو ئەگەر ئێمە دانەمەزرێنن وڵات چۆن پێش دەکەوێت".

"دامەزراندنمان تەنیا یەک ئیمزای سەرۆکوەزیرانی دەوێت و ماوەی شەش ساڵە بەچەندین شێوازی دیموکراسی داوامان کردووە ئەو ئیمزایەمان بۆ بکات کە دامەزراندن مافی خۆمانە"، ئەو نوێنەرە وایوت.

سێ یەکەمە دەرچووە دانەمەزراوەکانی زانکۆ و پەیمانگاکان کە ژمارەیان 9 هەزار کەس زیاترە داوای دامەزراندن لە حکومەتی هەرێم دەکەن و چەند جارێکیش هەوڵیانداوە لەگەڵ سەرۆکی حکومەت کۆببنەوە داواکارییەکانیان پێشکەش بکەن، بەڵام سەرۆکی حکومەت ئامادەنەبووە وەڵامیان بداتەوە.