حزبەکەی دۆناڵد ترەمپ زۆرینەی کۆنگرێسی ئەمریکایان مسۆگەر کردووە

هەرچەندە وا دەردەکەوێت کە سەرجەم دەسەڵات و بڕیارە گرنگەکانی ئەمریکا لای سەرۆکی وڵاتەکە بێت، بەڵام هەر لە دانانی دادوەرە فیدراڵییەکان و دانانی بودجەی گشتی وڵاتەکە، تا رەتکردنەوەی بڕیارەکانی سەرۆک و لابردنی لە پۆستەکەشی، لە دەسەڵاتی کۆنگرێسی وڵاتەکەدایە.
کۆنگرێس لە ئەنجوومەنی نوێنەران و ئەنجوومەنی پیران پێکدێت و ئەم دوو دەسڵاتەش بەبێ یەکتری ناتوانن کارەکانی ئەمریکا بەڕێوەببەن.
ئەنجوومەنی نوێنەران لە 435 ئەندام و ئەنجوومەنی پیرانیش لە 100 پێکدێن، بە گوێرەی ئەنجامە سەرەتاییەکانیش، پارتەکەی دۆناڵد ترەمپ، زۆرینەی دەنگەکانی هەردوو ئەنجوومەنەکەی بەدەست هێناوە.
کۆنگرێسی ئەمریکا دەسەڵاتی هەیە، هەر پڕۆژەیاسایەک لەلایەن سەرۆکەوە پێشنیاز بکرێت، بە دوو لەسەر سێی دەنگی ئەندامانی ئەنجومەنی نوێنەران و ئەنجومەنی پیران هەڵیبووەشێنێتەوە، بەپێی دەستوری ئەمریکاش، ئەنجوومەنی نوێنەران دەسەڵاتی لابردنی سەرۆکی وڵاتی هەیە.
هەرچی ئەنجوومەنی پیرانیشە، دەسەڵاتی دادگاییکردنی سەرۆکی هەیە، دەتوانێت بەڵێننامە نێودەوڵەتییەکان هەڵبوەشێنێتەوە و باڵیۆز و کونسوڵەکان بە پەسەندکردنی ئەنجوومەنی پیران دیاری دەکرێن.
ئێستابە بەدەستهێنانی زۆرینەی دەنگەکانی کۆنگرێس، دۆناڵد ترەمپ تەواوی دەسەڵاتەکانی ئەمریکای بۆ چەند ساڵی داهاتوو لایە و بە پاڵپشتیی زۆرینەی دەنگی ئەندامانای کۆنگرێس، دەتوانێت دەسەڵاتەکانی لە ناوخۆ و دەرەوەی ئەمریکادا بەکار بهێنێت.