زیلێنسکی: روسیا روبەڕوی گەورەترین شکست دەبێتەوە

ڤۆلۆدیمێر زلێنسکی، سەرۆكی ئۆكرانیا ڕایگەیاند، ڕاگرتنی هەناردەکردنی غازی ڕوسیا لە ڕێگەی ئۆکرانیاوە بۆ ئەوروپا، گەورەترین شکست دەبێت كە مۆسکۆ ڕوبەڕوی دەبێتەوە.
ئاماژەی بەوەشكرد، "کاتێک پوتن سەرۆکی ڕوسیا، پێش 25 ساڵ دەسەڵاتی ئەو وڵاتەی گرتە دەست، ساڵانە زیاتر لە 130 ملیار مەتر سێجا غازی لە ڕێگەی ئۆکرانیا هەناردەی ئەوروپا دەكرد، بەڵام ئەمڕۆ ئەو بڕە پارەیە بوەتە سفر، ئەوەش لە گەورەترین شکستە".
ئەوە لەكاتێكدایە کۆمپانیای گازپرۆمی ڕوسی، هەناردەكردنی غازی بۆ ئەوروپا لە ڕێگەی خاکی ئۆکرانیاوە ڕاگرت و هۆکارەكەی گەڕاندەوە بۆ کۆتاییهاتنی گرێبەستی گواستنەوەی غاز لە ڕێگەی ئۆكرانیاوە، كە گرێبەستە لە ساڵی 2019 ئیمزاکراوە و نوێ نەكرایەوە.
لە دوای شەڕی ڕوسیا دژی ئۆکرانیا لە ساڵی 2022، یەکێتی ئەوروپا پشتبەستنی بە غازی ڕوسیا کەمكردەوە، ئەوەش بوە هۆی بەرزبونەوەی نرخەکانی بۆ بەرزترین ئاستی خۆی و بەرزبونەوەی تێچوی ژیان لە سەرانسەری ئەوروپا.
ڤلادیمێر پوتن، سەرۆکی ڕوسیا هەفتەی پێشو ڕایگەیاند، کاتی پێویست نەماوە بۆ ئیمزاکردنی ڕێککەوتنێکی نوێ بە مەبەستی گواستنەوەی غاز لە ڕێگەی ئۆکرانیاوە، هەروەها کیڤیشی تۆمەتبارکرد بەوەی کە "دەبێت بەرپرسیارێتی ئەو کارە لە ئەستۆ بگرێت"، چونکە ڕەتیکردەوە ڕێککەوتنەکە درێژبکاتەوە.