گیدعۆن ساعر: پشتیوانیکردن لە کورد پێویستییەکی ئەخلاقییە

گیدۆن ساعر، وەزیری دەرەوەی ئیسرائیل رایگەیاند، پشتیوانیکردن لە کورد پێویستییەکی ئەخلاقی و دیپلۆماسییە، گوتیشی، کوردەکان لایەنگری رۆژئاوان، دۆستی ئەوانن و پێویستە پاڵپشتی بکرێن، هاوکات هۆشداریدا لە مەترسییەکانی هەڵوەشاندنەوەی ئیدارەی خۆسەر لە رۆژئاوای کوردستان.
لە چاوپێکەوتنێکی تایبەتدا لە گەڵ رۆژنامەی 'ئۆرشەلیم پۆست'ی ئیسرائیلی، ساعر جەختی لە پێویستیی پاڵپشتی دیپلۆماسی کورد لە سووریا کردووەو داوای لە کۆمەڵگەی نێودەوڵەتی کردووە بەرپرسیارێتی خۆی لەئەستۆبگرێت.
راشیگەیاندووە، لە گفتوگۆکانیدا کە لەگەڵ وەزیرانی دەرەوەی جیهان و لەنێویاندا ئەنتۆنی بلینکن، وەزیری دەرەوەی ئەمریکا، جەختی لە بەرپرسیارێتی کۆمەڵگەی نێودەوڵەتی کردووەتەوە بەرامبەر بە کورد.
وەزیری دەرەوەی ئیسرائیل، تیشکی خستووەتەسەر قوربانیدانی کورد لە شەڕی داعشداو رەخنەی لە سیاسەتی جیهانی گرتووە بەرامبەر بە دۆزی کورد لە بەراورددا لەگەڵ پرسەکانی دیکە، راشیگەیاندووە، تەنانەت هێندەی یەک لە سەدی دۆسیەی فەڵەستین گرنگییان بە دۆزی کورد نەداوە.