ئەمەریکا: ئاگربەستی نێوان هەسەدە و هێزەکانی سەربە تورکیا بەردەوامە

وەزارەتی بەرگری ئەمەریکا جەخت لەبەردەوامی ئاگربەستی نێوان هەسەدە و هێزەکانی سەر بە تورکیا لەدەوروبەری مەنبج دەکاتەوە رەتیشیدەکاتەوە کە پێشێل کرابێت.
سابرینا سینگ، وتەبێژی وەزارەتی بەرگری ئەمەریکا (پنتاگۆن) بە رۆژنامەنوسانی راگەیاند: ئاگربەستی نێوان هێزەکانی هاوپەیمانی تورکیا و هێزە کوردییەکان بە نێوەندگیری و پشتیوانی ئەمەریکا لە شاری مەنبج و دەوروبەری لە باکوری سوریا هێشتا بەردەوامە.
سابرینا سینگ جەختی لەوە کردەوە کە هیچ هەواڵێک لەبارەی پێشێلکردنی ئاگربەستەکە نەبوە.
ئەوەش لە کاتێکدایە لە سەرەتای مانگەوە ئاگربەستێک بە نێوەندگیری ئەمەریکا لە نێوان هێزەکانی هاوپەیمانی تورکیا و هێزەکانی سوریای دیموکرات(هەسەدە) لە مەنبج و دەوروبەری راگەیەندرا و هەسەدەش رایگەیاند؛ تورکیا ئاگربەستەکەی پێشێل کردوە و لە چەند ناوچەیەک هێرشی ئەنجامداوە.