هەسەدە هێرشێكی گەورەی چەكدارانی سەر بە توركیایان تێكشكاند

شەوی رابردو هەسەدە 46 ئەندامی گروپە چەکدارەکانی هاوپەیمانی تورکیای کوشت

هێزەکانی سوریای دیموکرات لە روبەڕوبونەوەیەکدا لە دەوروبەری مەنبج، 46 ئەندامی گروپە چەکدارەکانی هاوپەیمانی تورکیایان کوشتوە.
پێگەی سکای نیوز-ـی عەرەبی بڵاویکردوەتەوە، هێزەکانی سوریای دیموکرات (هەسەدە)، دوێنێ شەو لە ڕووبەڕووبوونەوەیەکدا لە دەوروبەری مەنبج لە باکوری رۆژهەڵاتی سوریا، 46 ئەندامی گروپە چەکدارەکانی هاوپەیمانی تورکیایان کوشتوە و ژمارەیەکیشیان بەدیل گرتوە.
ناوچەی مەنبەج کە زۆرینەی عەرەبە لە باکوری ڕۆژهەڵاتی پارێزگای حەلەب لەژێر کۆنترۆڵی "ئەنجومەنی سەربازیی منبج"دایە و هێزەکانی سوریای دیموکراتەوە سەرپەرشتی دەکرێن.
لە 27ـی تشرینی دووەمی 2024 ـەوە هاوکات لەگەڵ هێرشی دەستەی تەحریری شام بۆ سەر هێزەکانی بەشار ئەسەد، گروپەکانی نزیک لە تورکیاش هێرشیان بۆ سەر ناوچەکانی ژێر دەسەڵاتی هەسەدە دەستپێکردوە.
سەرۆکی ئیدارەی نوێی سوریا، محەمەد جۆلانی رۆژی دووشەممە لەگەڵ وەفدێکی هێزەکانی سوریای دیموکرات کۆبوەوە، بەرپرسێکی بەشدار لە کۆبونەوەکە بە ئاژانسی فرانس پرێسی وتووە، لەیەکەم کۆبونەوەی نێوانیان دانوستانەکان "ئەرێنی" بوون.