حزبوڵای لوبنان هه‌ره‌شه‌ی ده‌ستپێكردنه‌وه‌ی شه‌ڕ ده‌كات

نه‌عیم قاسم ئه‌مینداری گشتیی حزبوڵای لوبنانی ڕایگه‌یاند: ره‌نگه‌ ئارامگرییان به‌ر له‌مۆڵه‌ته‌ 60 ڕۆژییه‌كه‌ی ڕێككه‌وتنی ئاگربه‌ست له‌گه‌ڵ ئیسرائیل، كۆتایی پێبێت ‌و سه‌ركردایه‌تی حزبوڵا له‌باره‌ی كات‌ و چۆنیه‌تی وه‌ڵامدانه‌وه‌ی ئیسرائیل بڕیارێكی دیكه‌ بدات.
جه‌ختیشیكرده‌وه: هێزه‌كانیان چه‌ند ڕۆژێك له‌دوای كوژرانی حه‌سه‌ن نه‌سروڵا گڕو تینێكی وه‌به‌رهاتوه‌ته‌وه‌و ئه‌وه‌یشی له‌گۆڕه‌پانه‌كاندا سه‌لماندوه‌.
ئەوەشیخستەڕوو: هێزه‌كانیان له‌كاتی ئاگربه‌سته‌كه‌دا هێزی پترو هاوسه‌نگی ‌و كاریگه‌ریی زۆرتریان بۆ گه‌ڕاوه‌ته‌وه‌و به‌وپه‌ڕی تواناوه‌ ڕووبه‌ڕوی سوپای ئیسرائیل بوه‌ته‌وه‌و ئامانجه‌كانی په‌كخستوه‌.
باسی له‌وه‌شكرد: ئیسرائیل له‌میانی هه‌وڵه‌كانی بۆ چونه‌ ناو قوڵایی خاكی لوبنان ڕووبه‌ڕوی ئاسته‌نگی بووه‌ته‌وه‌و نه‌یتوانیوه‌ به‌ئامانجه‌كانی بگات كه‌ بریتییه‌ له‌داگیركردنی باشووری لوبنان، كه‌ ئه‌گه‌ر هێزه‌كانی حزبوڵا نه‌بوایه‌، ئه‌وه‌ی له‌سوریا ڕویدا له‌لوبنانیش دوباره‌بووایه‌وه‌.