بەفربارین و سەرما بەریتانیا ئیفلیج دەکات

میدیا جیهانییەکان باس لە کەشوهەوای بەریتانیا دەکەن و ئاماژەیان بەوەکردووە، پێدەچێت بەهۆی بەفر بارینی زۆر و سەرما و بەستنی رێگاکانەوە، بەریتانیا ئیفلیج ببێت و ئیش و کاری رۆژانە پەکی بکەوێت.
ئاژانسی بی ئەی میدیای بەریتانی بڵاویکردووەتەوە، پێشبینی دەکرێت بەریتانیا رووبەڕووی شەپۆلێکی سەرمای بەهێز و بەفربارینی چڕ ببێتەوە، بەهۆیەوە شەقام و رێگا و بانەکان بیانبەستێت، تەنانەت لەوانەیە گەشتەکان لەرێگای هێڵی ئاسنی و فڕۆکەشەوە رابگیرێن.
ئەو ئاژانسە ئەوەشی خستووەتەڕوو: بەپێی دوایین ئەو پێشبینییانەی بۆ وڵاتەکە کراوە بۆماوەی یەک هەفتەی داهاتوو، چاوەڕواندەکرێت شەپۆلێکی چڕی بەفربارین و سەرما وڵاتەکە بگرێتەوە و لە هەندێک ناوچەی وڵاتەکەشدا ئاستی بەفربارین بگاتە ٣٠ سانتیمەتر.
ئەوەش لەکاتێکدایە، بەهۆی ئەو گۆڕانکارییە ژینگەییانەی کە روویانداوە و گۆڕانی کەشوهەوا لە جیهاندا، شارەزایانی کەشناسی باس لەوەدەکەن، پێشبینییەکانی کەشوهەوا رەنگە هەندێکجار بۆماوەی درێژخایەن راست دەرنەچن و بگۆڕێن.