ئەمریکا کار لەسەر پلانێک بۆ دواى شەڕی غەززە دەکات

لەگەڵ دەستپێکردنەوەی دانوستانەکانی ئاگربەست لە غەززە و ئازادکردنی بارمتەکانی ئیسرائیل، ئیدارەی ئەمریکا کار لەسەر پلانێک بۆ پاش شەڕی غەززە دەکات.
ئەنتۆنی بلینکن، وەزیری دەرەوەی ئەمریکا رایگەیاند: چەند مانگێکە، لەگەڵ زۆرێک لە وڵاتانی ناوچەکە، بەتایبەت هاوبەشە عەرەبەکانیان، سەرقاڵی ئامادەکردنی پلانی دوای شەڕن لە غەززە، ئەگەر دەرفەتیان نەبێت لە ماوەی دوو هەفتەی داهاتوودا پلانەکە جێبەجێ بکەن، ئەودەم رادەستی ئیدارەی دۆناڵد ترەمپی دەکەن و  دواتر بڕیار دەدەن لە بەرەوپێشبردنی رێککەوتنەکە.
لێدوانەکەی بلینکن دواى ئەوە هات کە حەماس دەستپێکردنەوەی دانوستانەکانی لە دەوحەی پایتەختی قەتەر راگەیاند و ئاماژەی بەوەدا: دانوستانەکان لەسەر ئاگربەستی یەکجارەکی و گەڕانەوەی ئاوارەکان و کشانەوەی سوپای ئیسرائیلە لە کەرتی غەززە.
سەبارەت بەو پلانەش میدیاکانی ئیسرائیل رایانگەیاند: لە رۆژی پێنجشەممەی رابردووەوە ئەو پلانە لەسەر مێزی کۆبوونەوەکانی سەرۆکایەتیی ئیسرائیلە و چەند بابەتێکی تێدا خراونەتەڕوو، دیارترینیان دۆزینەوەی شوێنگرەوەیەکە بۆ دەسەڵاتی حەماس لە غەززە.