نەتەوە یەکگرتووەکان: نزیکەی هەزار ئاوارەی سووریایی لە هەرێمی کوردستانەوە گەڕاونەتەوە وڵاتەکەیان

ئاژانسی پەنابەرانی سەر بە نەتەوە یەکگرتووەکان رایگەیاندووە، لەدوای ڕووخانی دەسەڵاتی بەشار ئەسەدەوە، 948 پەنابەری سووریایی لە دەروازەی پێشابوورەوە گەڕاونەتەوە رۆژاوای کوردستان و سوریا، 105 لەوانەی گەڕاونەتەوە، ناوی خۆیان لای نەتەوە یەکگرتووەکان وەکو پەنابەر تۆمارکردووە.
ئاژانسەکە بڵاویکردەوە، لەوەتەی رژێمی بەشار ئەسەد لە 8ی کانوونی یەکەمی ڕابردووەوە ڕووخاوە، زیاتر لە 115 هەزار سووریایی گەڕاونەتەوە وڵاتەکەیان و زۆربەشیان لە وڵاتانی تورکیا و ئوردنەوە گەڕاونەتەوە. 
لەبارەی گەڕانەوەی پەنابەران لە هەرێمی کوردستان بۆ رۆژاوای کوردستان و سووریا، ئاژانسەکە رایگەیاندووە، لە هەشتی مانگی رابردووەوە تاوەکو 2ی ئەم مانگە، 948 کەس لە رێگەی دەروازەی پێشابوورەوە گەڕاونەتەوە سووریا.
هەر بەگوێرەی ئاژانسەکە، نزیکەی 664 هەزار سووریایی ‌هێشتا لەنێوخۆی سووریا ئاوارەن و زۆربەی ئاوارەکانیش خەڵکی پارێزگاکانی حەلەب و ئیدلبن، لانیکەم 486 هەزار ئاوارە گەڕاونەتەوە بۆ ناوچەکانی خۆیان، کە زۆربەیان گەڕاونەتەوە حەلەب.