تەواوی دەرچوانی كەركوك و شەنگال و ناوچە دابڕاوەكان لە زانكۆكانی هەرێم وەرگیران

بەمەبەستی زیاتر خزمەتكردن بە خوێندكارانی ناوچە دابڕێنراوەكانی كوردستان، دكتۆر ئارام محەمەد قادر وەزیری خوێندنی باڵا و توێژینەوەی زانستی بڕیاریدا، سەدا سەدی دەرچووانی قۆناغی ئامادەیی لە سنووری كەركوك و شنگال و خانەقین و ناوچە كوردستانییەكانی دەرەوەی ئیدارەی هەرێمی كوردستان لە زانكۆكانی هەرێمی كوردستان وەربگیرێن، كە ژمارەیان نزیكەی هەزار خوێندكارە.
هاوكات لای خۆیەوە وەزیری خوێندنی باڵا سەرەڕای گەیاندنی پیرۆزبایی بەو خوێندكارانە ڕایگەیاند: چەندین ساڵە كارئاسانی تەواویان كردووە بۆ وەرگرتنی خوێندكارانی ناوچە دابڕێندراوەكان، بەتایبەت ئەو خوێندكارانەی لە خوێندنگە كوردییەكان دەخوێنن، بۆ ئەوەی دەرفەتی خوێندنیان بۆ بڕەخسێنرێت لە زانكۆكانی هەرێمی كوردستان و هیواشی خواست، دوای تەواوكردنی خوێندن لە زانكۆكانی هەرێم خزمەت بە كوردستان بكەن.