سودانی بۆ راوێژکارەکانی: ئەگەر بۆ میدیا قسەدەکەن دەستبەرداری پۆستەکانتان بن

لێدوانی راوێژکارێکی سودانی لەبارەی گرووپە چەکدارەکانەوە کاردانەوەی لێدەکەوێتەوە، سەرۆکوەزیرانیش بە بڕیارێک بەبێ مۆڵەتی رەسمی لێدوان لە راوێژکارەکانی قەدەغەی دەکات.
نووسینگەی محەمەد شیاع سودانی سەرۆکوەزیرانی عێراق لە راگەیەندراوێکیدا بڵاویدەکاتەوە: سودانی راوێژکارەکانی حکومەتەکەی ئاگادار کردووەتەوە، بەبێ مۆڵەتی رەسمی هیچ جۆرە زانیارییەک نەدەن بە میدیاکان کە پێچەوانەی چوارچێوە گشتییەكانی ئیدارەدانی دەوڵەت بێت.
بەپێی راگەیەندراوەکە، سودانی بە راوێژکارەکانی وتووە: هەر یەکێکتان قسە بۆ میدیا دەکات، وازبێنێت لە پۆستەکەی و خۆی یەکلایی بکاتەوە بۆ دەربڕینی بۆچوونەکانی.
بڕیارەکەی سەرۆکوەزیران پاش ئەوە دێت، ئیبراهیم سمێدعی، راوێژكاری سەرۆكوەزیرانی عێراق لە چاوپێكەوتنێكی تەلەڤزیۆنیدا ئاشكرایكردبوو، "حکومەتی عێراق لە لایانە ناوخۆیی و نێودەڵەتییەکانەوە داوایلێکراوە گرووپە چەکدارەکان چەک بکات، هۆشداری بە عێراق دراوە لە مەترسییەکانی جێبەجێنەکردنی داواکارییەکە".