له‌ گۆره‌ به‌كۆمه‌ڵه‌كه‌ی سه‌ماوه‌ روفاتی 3 ژنی تێدایه‌ كه‌ دووگیان بوونه‌

به‌یانی ئه‌مڕۆ 22-12-2024 به‌ئاماده‌بوونی خانمی یه‌كه‌می عیراق له‌سه‌ماوه‌ گۆڕ‌ێكی به‌كۆمه‌ڵ هه‌ڵدرایه‌وه‌ كه‌ روفاتی 150 ژن و منداڵی كوردی تێدایه‌و سه‌رجه‌میان گه‌رمیانیین و به‌پێی به‌ڵگه‌كان چه‌ند ژنێكیان له‌و سه‌رده‌مه‌دا دوو گیان بوون، ئه‌ندامێكی ئه‌نجومه‌نی نوێنه‌رانیش ده‌ڵێت: "ده‌رده‌كه‌وێت روفاته‌كان چاو و ده‌ستیان به‌ستراوه‌ته‌وه‌و گولله‌باران كراون، چونكه‌ شوێنه‌واری گوللـه‌ به‌ رووفاته‌كانه‌وه‌ هه‌یه‌".

كاروان یاروه‌یس ئه‌ندامی ئه‌نجومه‌نی نوێنه‌رانی عیراق رایگه‌یاند: "له‌ناو گۆڕ‌ه‌به‌كۆمه‌ڵه‌كه‌دا روفاتی 150 كه‌س دۆزراونه‌ته‌وه‌ كه‌ سه‌رجه‌میان خه‌ڵكی گه‌رمیانن و ژن و منداڵن و جلوبه‌رگی به‌هاره‌یان له‌به‌ردایه‌، هاوكات له‌ناویشیاندا سێ روفاتی ژن هه‌ن كه‌ له‌و سه‌رده‌مه‌دا دووگیان بوون".

" كاروان یاروه‌یس وتی:"روفاته‌كان چاو و ده‌ستیان به‌ستراوه‌و گولله‌باران كراون و دواتر به‌كۆمه‌ڵ خراونه‌ته‌ ژێر خاكه‌وه‌، هاوكات شوێنه‌واری فیشه‌كی كڵاشینكۆف له‌گۆڕ‌ه‌به‌كۆمه‌ڵه‌كه‌دا دۆزراوه‌ته‌وه‌"

ئه‌ندامه‌كه‌ی ئه‌نجومه‌نی نوێنه‌رانی عیراق راشیگه‌یاند: "ئه‌م گۆڕ‌ه‌ به‌كۆمه‌ڵه‌ یه‌كێكه‌ له‌و سێ گۆڕ‌ه‌به‌كۆمه‌ڵه‌ی كه‌ ئه‌مریكییه‌كان له‌كاتی گه‌ڕ‌ان به‌دوای كوه‌یتییه‌كاندا دۆزیویانه‌ته‌وه‌و به‌جێیانهێشتووه‌، پێشتر یه‌كێك له‌و گۆڕ‌انه‌ هه‌ڵدرانه‌وه‌، ئه‌مڕ‌ۆش گۆڕ‌ی دووه‌م هه‌ڵدرایه‌وه‌و له‌داهاتووشدا سێیه‌م گۆڕ‌ی به‌كۆمه‌ڵ هه‌ڵده‌درێته‌وه‌".

وتیشی: "له‌ئێستادا تیمه‌كان كاری خۆیان ده‌كه‌ن و له‌قۆناغی دووه‌مدا سه‌رجه‌م روفاته‌كان بۆ پشكنین ره‌وانه‌ی پزیشكی دادوه‌ری به‌غدا ده‌كرێن و سامپڵی خوێن له‌كه‌سوكاری ئه‌نفالكراوان وه‌رده‌گیرێت، دواتریش له‌مه‌ڕ‌اسیمێكی شایسته‌دا له‌چه‌مچه‌ماڵ به‌خاكده‌سپێرێن".

ئه‌مڕ‌ۆ به‌ئاماده‌بوونی شاناز ئیبراهیم ئه‌حمه‌د خانمی یه‌كه‌می عیراق و لێپرسراوان و پارێزگاری موسه‌نا، گۆڕ‌ێكی به‌كۆمه‌ڵ له‌بیابانی ته‌ل شێخیه‌ی پارێزگای سه‌ماوه‌ هه‌ڵدرایه‌وه‌ كه‌ ژن و منداڵن و سه‌رجه‌میان كوردن و تاوانه‌كه‌ بۆ زیاتر له‌ 35 ساڵ پێش ئێستا ده‌گه‌ڕێته‌وه‌، كه‌ له‌سه‌ر ده‌ستی رژێمی دیكتاتۆری پێشووی عیراق به‌رامبه‌ر به‌كورد كراوه‌.