وەزارەتی ناوخۆی عیراق: ئاسایشی سلێمانی هاریكاری سەرەكیمانە

 وەزارەتی ناوخۆی عیراق، ستایشی هەوڵەكانی ئاسایشی سلێمانی دەكات و دەڵێت هاوبەشی و پشتیوانی سەرەكی هێزەكانمانن، حوسێن تەمیمی بەڕێوەبەری راگەیاندن و پەیوەندییەكانی بەڕێوەبەرایەتی گشتی كاروباری ماددە هۆشبەرەكان و كارتێكەرە عەقڵییەكان لەوەزارەتی ناوخۆی عیراق لەلێدوانێكی تایبەتدا ستایشی هەوڵەكانی بەڕێوەبەرایەتی بەرەنگاربوونەوەی ماددە هۆشبەرەكانی لەسلێمانی كرد و رایگەیاند هاریكاری و هەماهەنگی پتەو لەنێوان بەڕێوەرایەتییەكەمان و بەڕێوەبەرایەتی بەرەنگاربوونەوەی ماددە هۆشبەرەكان لەسلێمانی هەیە و ئەو هاریكارییەش هۆكارێك بووە بۆ رێگری لەبڵاوبوونەوەی ماددەی هۆشبەر و توانیومانە پێكەوە تۆمەتبارانی دۆسێیەكانی تایبەت بەماددە هۆشبەرەكان بەسزابگەیەنین، لێپرسراوە باڵاكەی وەزارەتی ناوخۆی عیراق راشیگەیاندووە بەهاوكاری و هەماهەنگی  بەڕێوەبەرایەتی بەرەنگاربوونەوەی ماددە هۆشبەرەكان لەسلێمانی دەست بەسەر سەدان كیلۆگرام ماددەی هۆشبەر بگیرێت و چەندین گرووپی بازرگانیش بەو ماددانەوە هەڵوەشێندراونەتەوە.
لەلێدوانە تایبەتەكەدا بەڕێوەبەری راگەیاندن و پەیوەندییەكانی بەڕێوەبەرایەتی گشتی كاروباری ماددە هۆشبەرەكان و كارتێكەرە عەقڵییەكان لەوەزارەتی ناوخۆی عیراق باسی لەئۆپراسیۆنێكی تایبەتی هاوبەشی هێزەكانیان لەگەڵ هێزەكانی ئاسایشی سلێمانی كردووە و رایگەیاندووە بەهەوڵێكی هاوبەش توانراوە كارگەیەكی بەرهەمهێنانی ماددەی هۆشبەردا دەستی بەسەردا بگیرێت و دەستیش بەسەر سەدان كیلۆگرام ماددەی هۆشبەردا بگیرێت.