بەڕێوەبەرایەتیی خۆسەر: ئەوەی لەبەرامبەر عەلەوییەکان دەکرێت خزمەتی داهاتووی سووریا ناکات

بەڕێوەبەرایەتیی خۆسەر راگەیەندراوێکی لەبارەی رووداوەکانی تەرتووس و گرژییەکانی ناوچەکە بڵاوکردەوە، تێیدا داوادەکات رێگە نەدرێت هیچ توێژێک بکرێنە ئامانج، چونکە ئەو کارانە دژی فرەییە لە سووریا.
ئەمڕۆ بەڕێوەبەرایەتیی خۆسەر لە راگەیەندراوێکدا دەڵێت 'لەگەڵ پێشهاتە خێراکانی سووریا و دوای رووخانی رژێمی بەعس، پێویستە بە بیرکردنەوەیەکی نوێوە هەنگاو بۆ بونیاتنانی سووریای نوێ بنێین، یەکڕیزی و یەکێتیی گەلی سووریا پێویستییەکی مێژووییە بۆ گەشەپێدانی نموونەیەکی جیاواز لە بەڕێوەبردنی وڵات.
دەشڵێت فرەیی لە نیشتمانە سوورییەکەماندا دەوڵەمەندە و بەهایەکی نیشتمانی و کۆمەڵایەتیی هەیە کە بەعس لێی زەوتکرد و نیشانەکانی سڕییەوە.
دوێنێ زۆربەی عەلەویییەکان لە شارەکانی تەرتووس، لازقیە، حەما، حمس و چەند ناوچەیەکی دیکەی سووریا لە دژی سووتاندنی مەزارگەیەکی کەسایەتییەکی عەلەوی لە شاری حمس خۆپێشاندانیان کرد. وەزارەتی ناوخۆی سووریا رایگەیاند لە ئەنجامی رووبەڕووبوونەوەی پۆلیس و خۆپێشاندەران چەند کارمەندێکیان کوژران.