میدیای نزیک لە پارتی یەکسانی و دیموکراسیی گەلان "دەم پارتى" بڵاویکردەوە، هەفتەی داهاتوو وەفدی پارتەکە بۆ دووەم جار سەردانی ئیمراڵی دەکاتەوە.
هەواڵی سەردانییەکە لەسەر زاری چەند بەپرسێکی دەم پارتى بڵاوکراوەتەوە و ئاماژە بەوەکراوە، لە دیدارەکەدا بنەما سەرەکییەکان و ناونیشانی پرسەکان دیاریدەکرێن و گفتوگۆ لەبارەی نەخشەڕێگەی چارەسەری کێشەکان دەکرێت.
لەبارەی پرسی چەکدانانیش سەرچاوەکان بە دووری دەزانن لە دیداری دووەمی ئیمراڵیدا بانگەوازی چەکدانان بکرێت و دەڵێن، لەم قۆناغەدا ئەگەری یەکلاکردنەوەی ئەو بابەتە لاوازە.
بڕیارە بەر لە دیداری دووەمی ئیمراڵی، وەفدی دەم پارتى سەردانی سەڵاحەدین دەمیرتاش و فیگەن یۆکسەکداغ، هاوسەرۆکانی پێشووی هەدەپە و چەند بەرپرسێکی زیندانیکراوی کورد بکەن و پاشانیش روونکردنەوەیەکی ورد لەبارەی کۆی سەردانەکان بڵاوبکەنەوە.
ئەمەش لەکاتێکدادێت: رۆژی 28ـی کانوونی یەکەمی 2024 دیداری یەکەمی ئیمراڵی ئەنجامدرا و هەریەک لە سڕی سورەیا ئۆندەر، پەرلەمانتاری دەم پارتى لەسەر بازنەی ئیستانبوڵ و پەروین بوڵدان، پەرلەمانتاری دەم پارتى لەسەر بازنەی وان، لەگەڵ عەبدوڵا ئۆجەلان، رێبەری زیندانیکراوی پەکەکەدا کۆبوونەوە.
Copyright © 2020 Kirkuk Tv All Rights Reserved Designed And Developed By AVESTA GROUP