فراکسیۆنی یەکێتی: ئیدانەی درێژکردنەوەی ئابڵوقەی سەر فرۆکەخانەی نێودەوڵەتی سلێمانی دەکەین

فراکسیۆنی یەکێتی لە ئەنجومەنی نوێنەرانی عیراق درێژکردنەوەی ئابلوقەی ناڕەوای سەر فرۆکەخانەی نێودەوڵەتی سلێمانی لەلایەن حکومەتی تورکیاوە بۆ ماوەی شەش مانگی تر ئیدانە دەکات.
فراکسیۆنی یەکێتی لە ئەنجومەنی نوێنەرانی عیراق لە راگەیەندراوێکدا ئاماژەی بەوەکردووە: ئەم بڕیارە هیچ پاساوێکی یاسایی و هونەری و خزمەتگوزاری و ئەمنی نیەو پێچەوانەی رێکەوتنامەو بنەما نیودەوڵەتیەکانە لە بواری فرۆکەوانی مەدەنیداو بڕیارێکی سیاسیە.
فراکسیۆنی یەکێتی باس لەوەشدەکات: لەهەمانکاتدا نیگەرانین لەئاست بێدەنگی حکومەتی فیدرال و حکومەتی هەرێم و داوایان لێدەکەین بەراشکاوی هەڵوێستیان رابگەیەنن و روونی بکەنەوە لەماوەی دوو ساڵدا کە ئابڵوقە لەسەر فرۆکەخانەی نێودەوڵەتی سلێمانی سەپێندراوە چ هەنگاوێکیان ناوە.
هەر لە راگەیەندراوەکەی فراکسۆنی یەکێتیدا هاتووە: لەکاتێکدا چەند لیژنەیەک لە پەرلەمان و حکومەتەوە لەرابردودا هاتوونەتە فرۆکەخانەی نێودەوڵەتی سلێمانی و لەراپۆرتەکانیاندا سەلماندوویانە فرۆکەخانەی نێودەوڵەتی سلێمانی هیچ گرفتێکی ئەمنی و خزمەتگوزاری و یاسایی نیە.