تورکیاو گروپە چەکدارەکان گوندەکانی دەوروبەری حەسەکەی بۆردوومان دەکەن

تورکیا و گرووپە چەکدارەکانی ، گوندەکانی دەوروبەری حەسەکەیان بۆردوومان کردو سوپای ئەمریکاش درۆنێکی خستەخوارەوە.
روانگەی سووری بۆ مافەکانی مرۆڤ بڵاویکردەوە، سوپای تورکیا و گرووپە چەکدارەکان بە تۆپی قورس گوندەکانی خەزراوی و تەل حەرمل و موشیرفەیان لە دەوروبەری حەسەکە بۆردوومان کردووە.
لەبارەى زیانەکان روانگەکە ئاماژەی بەوەکردووە، تاوەکو ئێستا هیچ زانیارییەک لەسەر قەبارەی زیانەکان نییە.
هاوکات، سیستمی بەرگریی ئاسمانیی هێزەکانی ئەمریکا لە بنکەی سەربازیی خەراب جیر لە رمێلانی باکووری پارێزگای حەسەکە، درۆنێکیان خستووەتەخوارەوە.
بە وتەی روانگەی سوری، درۆنەکە ویستوویەتی هێرشبکاتە سەر بنکەکە، بەڵام پێش ئەوەی بگاتە ئامانجەکەی تەقێندراوەتەوە.
هاوکات، لەگەڵ هێرشەکەدا هێزەکانی ئەمریکا کەوتوونەتە حاڵەتی ئامادەباشییەوە و فڕۆکە جەنگییەکانی ئەمریکا لە ئاستێکی نزمدا بە ئاسمانیی ناوچەکەدا دەسوڕێنەوە.