وەزارەتی دارایی هەرێم: سەرجەم تێبینی و كێشە هونەرییەكانی لیستی مووچەمان چارەسەركردووە

وەزارەتی دارایی هەرێم ڕایدەگەینێت: سەرجەم تێبینی و كێشە هونەرییەكانی لیستی مووچەمان چارەسەركردووە.

وەزارەتی دارایی هەرێمی کوردستان راگەیەندراوێکی سەبارەت بەلیستی مووچە بڵاوکردەوە و دەڵێت، لە مانگی رابردوودا سەرجەم تێبینی و كێشە هونەرییەكانی لیستی مووچەمان چارەسەركردووە و تیمە تەكنیكیەكانمان بەردەوام لەگەڵ تیمی تەكنیكیی وەزارەتی دارایی عێراق لەسەر هێڵ بوون تا هیچ بیانوویەك بەدەست حكومەتی عێراقەوە نەمێنیت بۆ نەناردن و دواخستنی مووچەی فەرمانبەرانی هەرێمی كوردستان.

وەزارەتی دارایی هەرێمی کوردستان ئاماژەی بەوەشكردووە: لە دوایین كۆبوونەوەی وەفدی هەردوو وەزارەتدا كە لە بەغداد بەڕێوەچوو، وەزیری دارایی عێراق بەڵێنیدا تەموویلی مانگی دوانزە و ئەو بڕەی بۆ مانگی یانزە پێویستە چارەسەر بكات.

وەزارەتی دارایی هەرێم ئاشکرایشی دەکات: لەگەڵ ئەوەی چەند تەرخانكراوێكمان لە پشكی هەرێم لە یاسای بودجە هەیە و دەتوانین بیگوازینەوە بۆ پڕكردنەوەی كورتهێنانی مووچە، بەڵام دوای چەندین بڕیار بۆ گواستنەوەی بڕی 430 ملیار دینار، تا كورتهێنانی مووچەی سێ مانگی كۆتایی ساڵی پێپڕبکەینەوە، بەهۆی كێشەی نوێوە جێبەجێ نەکرا.