جۆزێف عەون بە سەرۆکی نوێی لوبنان هەڵبژێردرا

لە گەڕی دووەمی دەنگدان لە پەرلەمانی لوبنان، جۆزێف عۆن وەک 14ـهەمین سەرۆککۆماری لوبنان هەڵبژێردرا.

دوای دوو ساڵ پەرلەمانی لوبنان دانیشتنی تایبەتی بە هەڵبژاردنی سەرۆککۆمار رێکخست و تێیدا جۆزێف عۆنی وەک 14ـهەمین سەرۆکی وڵاتەکە لە گەڕی دووەمی دەنگداندا هەڵبژارد.

لە گەڕی یەکەمی دەنگداندا، عۆن 71 دەنگی لەکۆی 128 ئەندامی پەرلەمان بەدەستهێنا و نەیتوانی بۆ وەرگرتنی پۆستەکە سەرکەوتوو بێت، بەڵام دوای دوو سەعات و لە گەڕی دووەمدا توانی 99 دەنگ لەکۆی 128 دەنگ بەدەستبهێنێت و وەک سەرۆکی لوبنان هەڵبژێردرێت.

جۆزێف عۆن، سەربە پێکهاتەی کریستانە لە پەرلەمانی لوبنان و لەلایەن سعودیا و ئەمەریکاوە پشتیوانی دەکرێت و لە ساڵی 2017 وەک سەرۆکی گشتی سوپای لوبنان دەستبەکاربووە.