پارێزگارێکی عیراق بەهۆی گەندەڵییەوە لە پۆستەکەی دوورخرایەوە

بەهۆی تێوەگلانی لە چەند دۆسیەیەکەوە مورتەزا ئیبراهیمی پارێزگاری زیقار لە پۆستەکەی دوورخرایەوە.

ئەمڕۆ ئەنجوومەنی پارێزگای زیقار کۆبووەوە و بە زۆرینەی دەنگ مورتەزا ئیبراهیمی پارێزگاریان لە پۆستەکەی دوورخستەوە.

مورتەزا ئیبراهیمی بە مەبەستی لێپرسینەوە لەبارەی چەند پرسێکەوە بانگهێشتی ئەنجوومەنی پارێزگا کرابوو، بەهۆی ئەوەی وەڵامەکانی باوەڕپێهێنەر نەبوون متمانەیان لێوەرگرتەوە.

ئەو پارێزگارە بەهۆی تێوەگلانی لە چەند دۆسیەیەکی گەندەڵی دارایی و کارگێڕی و نەبوونی هەماهەنگی لەگەڵ ئەنجوومەنی پارێزگا بڕیاری دوورخستنەوەی درا.

مورتەزا ئیبراهیمی ماوەی کەمتر لە ساڵێکە پۆستی پارێزگاری زیقاری وەرگرتووە.