دادگای فیدڕاڵی دانیشتنەکەی لەسەر چەند سکاڵایەکی تایبەت بەهەرێم دواخست

لەگەڵ ئەوەی  بڕیاربوو ئەمڕۆ 28ی كانونی دووه‌می 2025 دادگای باڵای فیدراڵی بۆ شەش سکاڵا دانیشتنی ئاسایی خۆی ئەنجام بدات، کە سیانیان  پەیوەندی بەهەرێمی کوردستانەوە هەبوو، کە تایبەت بوون بە نایاسایی بوونی رسومات و سزای سەرپێچی هاتووچۆ، هەڵوەشاندنەوەی وەزارەتەکانی شەهیدان و ئەنفالکراوان و ئەوقاف، هاوکات سکاڵایەکیش تایبەتە بە پشتگوێخستنی زمانی کوردی لە رۆژنامەی وەقائیعی عیراقیی، بەڵام دانیشتنەکە دواخرا.

بەپێی کارنامەکە دانیشتنی ئەمڕۆ، کە وابڕیاربوو بەڕێوەبچێت و دواتر دواخرا، سێ سکاڵایان پەیوەندی بە هەرێمی کوردستانەوە هەیە، کە یەکێکیان لەسەر سەرۆکی حکومەتی هەرێمی کوردستان و وەزیری ناوخۆ تۆمار کراون و تایبەتن بە نایاسایی بوونی سزای هاتووچۆ بۆ ئەو ئۆتۆمبێلانەی چەند جارێک لەسەر یەک شەقام خێرایی رێگەپێدراو تێدەپەڕێنن و سزا دەدرێن، لەگەڵ  نادەستوریبوونیی ئەو رسوماتەی کە کۆمپانیاکانی پشکنینی ئۆتۆمبێل بۆ مەرجی توندوتۆڵی لە هاووڵاتیانی وەردەگرن.

سکاڵای دووەمیش تایبەت بوو بە نادەستوریبوونی وەزارەتی شەهیدان و ئەنفالکراوان، کە لە سکاڵاکەدا داوا دەکرا وەزارەتەکە هەڵبوەشێتەوەو لەبری دەستەی شەهیدان پێکبهێنرێت، کە سەر بە ئەنجومەنی وەزیرانی هەرێمی کوردستان بێت.

سکاڵای سێیەمیش تایبەت بوو بە نادەستوریبوونی وەزارەتی ئەوقاف کە داوا دەکرا وەزارەتەکە هەڵبوەشێنرێتەوە و دیوانی ئاینی پێکبهێنرێت و بەجۆرێک سەرجەم ئاین و ئاینزاکان لەخۆبگرێت.

هاوکات سکاڵایەکی  دیکە ئاڕاستەی دادگای فیدراڵی کرابوو تێیدا داواکراوە، کە زمانی کوردی بۆ رۆژنامەی وەقائیعی عیراقی زیاد بکرێت، کە لەئێستادا پشتگوێخراوە، هەروەها داواشکراوە رۆژنامەکە لە داهاتوودا بە زمانی کوردیش بڵاوبکرێتەوەو ژمارەکانی رابردووش وەربگێڕدرێنە سەر زمانی کوردی.