خزمەتگوزارییەکانی تیکتۆک لە ئەمریکا گەڕایەوە و ئێستا بەردەستە

لە ئەمریکا، جارێکی دیکە تیکتۆک لە گوگڵ پلەی و ئەپ ستۆر بەردەست دەبێتەوە و بەکاربەران دەتوانن بەکاری بهێنن.
دوای ئەوەی کۆنگرێسی ئەمریکا قەدەغەی تیکتۆکی لە ئەمریکا پەسەند کرد و جۆ بایدن ئیمزای لەسەر کرد، ماوەی چەند هەفتەیەک تیکتۆک لە ئەمریکا بەردەست نەبوو.
دوای گەڕانەوەی ترەمپیش بۆ کۆشکی سپی، یاساکەی کۆنگرێسی بۆ ماوەی 75 ڕۆژ ڕاگرت و دەرفەتی بە کۆمپانیاکە دا تا لەو ماوەیەدا یان تیکتۆک بفرۆشێت یان خۆی لەگەڵ یاسای نوێی کۆنگرێسدا بگونجێنێت، داوای کردبوو ڤێرژنێکی ئەمریکی درووست بکات و لە بری ڤێرژنە چینییەکە بیفرۆشێت.
تیکتۆک زیاتر لە 170 ملیۆن بەکاربەری لە ئەمریکا هەیە. ئەمریکا نیگەرانە لەوەی تیکتۆک بۆ سیخوڕی بهێنرێت و زانیاریی بەکاربەران بداتە دەوڵەتی چین. چینیش ئەم تۆمەتانە ڕەتدەکاتەوە.
بەگوێرەی ئامارەکانی کۆمپانیای سینسۆر، پار تیکتۆک دووەم ئەپی دابەزێنراوبووە لە ئەمریکا و زیاتر لە 52 ملیۆن جار دابەزێندراوەتە ناو مۆبایلەکان، زۆرینەی دابەزاندنەکانیش لە ئەپستۆری ئەپڵەوە بووە.