عیراق و تورکیا لەسەر دۆسییەی ئاو رێککەوتوون

راوێژکاریی سەرۆک وەزیرانی عێراق جەخت دەکاتەوە دۆخی ئاو لە وڵاتەکە خراپ نییە و رایشیدەگەیەنێت: بەردانەوەی ئاو لە تورکیاوە زیادیکردوە و گفتوگۆکانیشیان لەگەڵ ئەو وڵاتە لەوبارەیەوە بەردەوامە.
تورهان موفتی، راوێژکاری سەرۆک وەزیرانی عێراق رایگەیاند: راستە عێراق کێشەی کەمی ئاوی هەیە، بەڵام تووشی وشکەساڵی نەبووە و ئەگەر ستراتیژییەکی بەهێز دابنێن دەتوانن بگەنە ئەنجامێکی زۆر باش.
وتیشی: لە داهاتوویەکی نزیکدا دەتوانن کۆنترۆڵی بەردانەوەی ئاو بکەن و لەهەمانکاتدا پارێزگاریی لە ئاوی ژێر زەویش بکەن.
ئاشکراشی کرد دوای ئەوەی یاداشتنامەی لێکتێگەیشتنیان لەگەڵ تورکیا ئیمزا کرد، بەردانەوەی ئاو گەیشتوەتە باشترین دۆخ و گفتوگۆکانیشیان لەگەڵ تورکیا لەوبارەیەوە بەردەوام دەبێت تا دۆخی ئاو بەرەو باشتریش ببەن.