هەرێم زیاتر لە 48 ملیار دینار دەخاتە سەر هەژماری فیدراڵ

وەزارەتی دارایی هەرێم بڕی زیاتر لە 48 ملیار دینار لە داهاتی نانەوتی هەرێم دەخاتە سەر هەژماری بانکی حکومەتی فیدراڵ.

وەزارەتی دارایی حکومەتی هەرێمی  کوردستان لە راگەیەنداروێکدا رایگەیاند: "ئەمڕۆ دووشەممە ( ١٧ ی ئازاری ٢٠٢٥ ) حکومەتی هەرێم لە داهاتی نانەوتی هەرێمی کوردستان بۆ مانگی شوباتی ساڵی ( ٢٠٢٥ ) بڕی ( ٤٨،٧٢٢،٢٣٩،٠٠٠) چل و هەشت ملیارو حەوت سەدو بیست و دوو ملیۆن و دوو سەدو سی و نۆ هەزار دیناری خستە سەر هەژماری بانکی حکومەتی فیدراڵ".

ئاماژە بەوەش کراوە، کە ئەو بڕە پارەیە بەشێوەی کاش و لەرێگای بانکی وەزارەتی دارایی حکومەتی فیدراڵ لەلقی هەولێری بانکی ناوەندی عێراق گوازراوەتەوە".

پێشتریش وەزارەتی دارایی و ئابووری حکومەتی هەرێمی کوردستان لە داهاتی نانەوتی هەرێمی کوردستان بۆ مانگی کانونی دووەمی ساڵی ( ٢٠٢٥ ) بڕی ( ٥١،٨٩٥،٤٥٧،٨٧٧ ) پەنجاو یەک ملیارو هەشت سەدو نەوەدو پێنج ملیۆن و چوار سەدو پەنجاو حەوت هەزارو هەشت سەدو حەفتاو حەوت دیناری بەشێوەی کاش خستە سەر هەژماری بانکی وەزارەتی دارایی حکومەتی فیدراڵ لەلقی هەولێری بانکی ناوەندی عیراق.