خۆپیشاندانەكانی تورکیا بەردوامە

خۆپیشاندان و ناڕەزایی لە تورکیا دژی دەستگیرکردنی ئەکرەم ئیمام ئۆغڵو بەردەوامە و  تائیستاش زیاتر لە 400 کەس دەستگیرکراون، بەگوێرەی زانیاری میدیاکانی تورکیا دۆخەکە روو لەگرژی و ئاڵوزی دەکات. 

 چەند رۆژێکە خۆپیشاندان لە تورکیا دژی دەستگیرکردنی  سەرۆکی شارەوانی ئیستانبوڵ بەردەوامە، کە لەسەر سكاڵای داواكاری گشتی توركیا  تۆمەتی گەندەڵی و هاوكاریی تیرۆر و چەند تۆمەتێكی دیكەی رووبەرووکراوەتەوە، تاوەکو ئێستا ئیمامئۆغڵو و 100 لێپرسراو و ئەندامی جەهەپە دەستگیركراون.

 وەزارەتی ناوخۆی تورکیا ئاشکرایدەکات تەنیا ئەمڕۆ 37 کەسیان بە تۆمەتی بڵاوکردنەوەی بابەتی هاندان بۆ ئاژاوەگێڕی لە تۆڕە کۆمەڵایەتییەکاندا دەستگیرکردە.

 هەژماری رەسمی ئیمامئۆغڵو لە تۆڕی کۆمەڵایەتی ئێکس داوا لە هاووڵاتیان دەکات بێدەنگ نەبن و دژی ئەو رەوشە بوەستنەوە کە لە تورکیا سەری هەڵداوە.

لەیەکەم رۆژی سەرهەڵدانی گرژییەکانی ئیستانبوڵ زیاتر لە 350 کەس دەستگیرکران و هێڵەکانی ئینتەرنێتیش راگیران و هێشتا نارەزاییەکانیش بەردەوامە. 

دەستگیرکردنی ئیمامئۆغڵو لە کاتێکدایەچاوەڕوان دەکرا لە چەند رۆژی داهاتوودا وەک بەربژێری رەسمی پارتی جەهەپە بۆ پۆستی سەرۆک کۆمار و رکابەری ئەردۆغان دیاری بکرێت.

دەستگیرکردنی ئیمامئۆغڵو توڕەیی زۆری هاووڵاتیانی تورکیای لێکەوتووەتەوە و زۆربەیان پێیان وایە بابەتەکە سیاسییە و پەیوەندی بە هەوڵی درێژکردنەوەی وادەی سەرۆکایەتی ئەردۆغانەوە هەیە.

لە بەرانبەریشدا، عومەر چەلیک وتەبێژی ئاکپارتی، تۆمەتەکان رەتدەکاتەوە و جەخت لە سەروەریی یاسا و سەربەخۆیی کاری دادگاکان دەکاتەوە.